प्रदेश नं ५ का सभामुख पूर्णबहादुर घर्तीले प्रदेशसभा सदस्य उत्तरकुमार वलीको निधनले अपूरणीय क्षति भएको बताएका छन्।
प्रदेशसभाको एक वर्षे कार्यकालमा वलीको भूमिका प्रशंसनीय रहेको र प्रदेशसभामा सांसद वलीका अभिव्यक्ति तथा सहयोग सदा स्मरणीय रहने उल्लेख गर्दै उनले जारी विज्ञप्तिमा भनिएको छ, ‘वलीको निधनले समाज र प्रदेशसभामा अपूरणीय क्षति पुगेको छ’, सभामुख घर्तीले वलीको निधनमा श्रद्धाञ्जली प्रकट गर्दै परिवारजनमा समवेदना पनि व्यक्त गरेका छन्।
विज्ञप्तिमा आज एक दिन प्रदेशसभा सचिवालय बन्द रहने पनि बताइएको छ।
सडक दुर्घटनामा परी घाइते भएका वलीको गएराति काठमाडौंको मेडासिटी अस्पतालमा निधन भएको हो। गत माघ २४ गते प्रदेशसभा बैठक सकेर घर फर्किंदा उनी दाङको चिसापानीमा दुर्घटनामा परी घाइते भएका थिए।