खानेपानी मन्त्री बीना मगरलाई शुक्रबार संसदमा नेपाली कांग्रेसकी सांसद डिला संग्रौलाले सोधिन्- काठमाडौंबासीले मेलम्चीको पानी कहिले पिउन पाउँछन्?
संसदको रोष्टममा जवाफ दिन उक्लिएकी मन्त्री बीना मगरले मिति तोक्न सकिनन्।
पछिल्लो समय इटालियन कम्पनी सिएमसी आयोजना पूरा नगरी फर्किएपछि मेलम्ची आयोजना अनिश्चित बनेको छ। खानेपानी मन्त्रालयका सचिव गजेन्द्र ठाकुरको सरूवा भएको छ। सरूवा भएपछि पनि ठाकुरले मन्त्री मगरमाथि सार्वजनिक रूपमै कमिसनको चक्करमा लागेको टिप्पणी गरिरहेका छन्।
प्रतिनिधिसभाको प्रश्नोत्तरमा मगरलाई सांसदहरूले ठाकुरसँगको विवादबारे समेत प्रश्न गरे।
मन्त्री मगरले सचिवसँगको विवादबारे केही उल्लेख गरिनन्। बरू ठाकुरको विषयलाई ‘प्राथमिकता’ नदिने भन्दै उम्किइन्।
मन्त्री मगरले आफूले मन्त्रालय सम्हालेपछि मेलम्ची आयोजना स्पिडमा अगाडि बढेको, सुरुङ छिचोलिएको तथा सुरूङको ढलान गर्ने र गेट निर्माण गर्ने काम तीव्र रूपमा भएको बताइन्। तर आफ्नो निरन्तर प्रयत्न सफल नभएको बताइन्।
‘हामीले छिटोभन्दा छिटो सिएमसीद्वारा काम सम्पन्न गर्ने प्रयत्न गरी रह्यौं’, मगरले भनिन्, ‘सिएमसीबाट काम नभए अब रिटेण्डरबाट अगाडि बढ्नेछौं।’
उनले अझै पनि सिएमसी आए उसैबाट काम गराउने तयारीमा मन्त्रालय भएको बताइन्।
‘सिएमसी आउँछ भने नयाँ टेण्डरमा भन्दा छोटो अवधिमा काम सम्पन्न हुन्छ। त्योभित्र व्यवधान छन्। तर हामीले त्यसमा छलफल अगाडि बढाएका छौं। ठेक्काको मान्यताभित्र रहेर विधिसम्त ढंगले आए वेलकम गर्नेछ।’
सिएमसी नआए नयाँ टेण्डर गर्ने उनले बताइन्।
नेपाली कांग्रेसका सांसद गगन थापाले मन्त्री मगरलाई सचिव ठाकुरले लगाएको आरोप र कमिसनको विषयमा प्रश्न सोधेका थिए।
‘सचिव गजेन्द्र ठाकुरले मन्त्रीले मुलुक डुबाउने काम गर्दै हुनुहुन्छ, सहयोग गर्न सकिएन भन्नुभएको छ’, थापाले सोधे, ‘कि छापाले गलत छाप्यो। कि दुईमा एउटा दोषी हो। दोषीले सजाय पाउनुपर्छ।’
जवाफमा मन्त्री मगरले ‘पूर्वसचिवले के प्रश्न उठाए के उठाएन भन्ने म प्राथमिकता दिन चाहान्नँ’ भन्दै पन्छाइन्।
उनले मेलम्ची राष्ट्रिय गौरवको आयोजना भएको र आफ्नो सफलतासँग जोडिएको बताइन्। ‘म सँग जोडिएको, मेरो सफलतासँग जोडिएको विषय हो’, मगरले भनिन्, ‘मेलम्मीमा कुनैपनि गिद्दे नजर पर्न दिनेछैन। विश्वस्त हुनुस्।’
उनले मिडियामा मन्त्रीले राष्ट्र डुबाउन खोजेको भनेर टिप्पणी गर्ने व्यक्तिनै जिम्मेवार हुने बताए।
‘मन्त्रीले राष्ट्र डुबाउन खोजेको भन्ने विषयमा सम्बन्धित व्यक्ति जिम्मेवार हुन्छ’, मगरले भनिन्, ‘मलाई यो हिसाबकिताब आउँदैन।’
उनले आफूले सचिवलाई मेलम्ची प्लस सिएमसी इज इक्वेल टू काठमाडौंबासीको फर्मुलामा काम गर्न निर्देशन दिएको बताइन्।
‘तर त्यो फर्मुलामा काम गरेको पाइनँ’, मगरले भनिन्, ‘मन्त्रीले एक अर्ब खायो भनेर निकै प्रचारबाजी गरियो। मलाई निकै गम्भीर बनायो। म मन्त्री भएपछि ८४ करोड १५ लाख भुक्तानी गरेको हिसाब रहेछ। मन्त्रीले एक अर्ब खायो भनेर मिडियामा हल्ला पिटियो।ֹ’
उनले केही मिडियाले गरेको नियोजित प्रचारको पछाडि नलाग्न सांसदहरुलाई आग्रह गरिन्। ‘मन्त्रीले हल गर्न खोजेको विषयमा आत्मसात गरिदिनुहुन अनुरोध छ’, उनले भनिन्।
उनले मेलम्ची काठमाडौं ल्याउने मितिबारे सरकार र सिएमसीबीचको लखित सहमतिको आधारमा आफुले विगतमा धारणा राखेको बताइन्। ‘लिखित सहमतिका आधारमा बोलेको हो। तर त्यो पूरा गर्न सकिएन। थुप्रै लफडा बेहोर्न पर्यो। नयाँ प्रक्रियाबाट हुन्छ छिटो भन्दा छिटो काम हुन्छ’, मगरले भनिन्।
