संघीय समाजवादी फोरमका सांसद प्रदीप यादवले वाइडबडी जहाज खरिद प्रक्रियामा सत्तापक्ष र प्रतिपक्षको मौनतामाथि प्रश्न उठाएका छन्।
नेपाल वायुसेवा निगमले वाइडबडी जहाज खरिद गर्दा प्रक्रिया मिचेर अर्बौँ घोटाला भएको भन्दै सार्वजनिक लेखा समितिले भ्रष्टाचार ठहर गरेको थियो। समितिले दुई पूर्व र बहालवाला मन्त्रीलाई अनियमिततामा नैतिक जिम्मेवार ठहर गरेको थियो। त्यस्तै, निगमका महाप्रबन्धक सुगतरत्न कंसाकारसहित दुई सचिवलाई कारबाही सिफारिस गरेको थियो।
समितिको उक्त प्रतिवेदन हालसम्म कार्यान्वयन नभएका बेला लेखा समितिका सदस्यसमेत रहेका यादवले बुधबार बैठकमा प्रश्न गरे, 'सरकार किन चुप लागेर बस्यो?'
‘वाइडबडीमा यति ठूलो भ्रष्टाचार हुँदा पनि न सरकारको कोही बोल्छ न प्रमुख प्रतिपक्षी दलको,’ यादवले भने, ‘दुई ठूला नेताको नाम जोडिएका अस्पताल राष्ट्रिय स्तरको अस्पताल सूचीमा छुट्दा यही संसद पन्ध्र-पन्ध्र दिन अवरुद्ध भयो। वाइडबडी प्रकरणमा भने एक जनाले पनि टेबल ठटाएनन्।‘
‘भ्रष्टाचार गर्ने र गराउने मन्त्री झन्डा फरफराएर घुमिराखेको छ। तर सरकारले उसलाई कारबाही गरेको छैन, निलम्बन गरेको छैन,‘ उनले भने।
उनले वाइडबडी प्रकरणमा कसैलाई कारबाही नभए सरकार र संसदप्रति जनताको विश्वास घट्ने बताए।
यादवपछि वाइडबडीमाथि नै बोलेका नेकपा सांसद महेश बस्नेतले भने प्रमुख प्रतिपक्षी दलका नेता र लेखा समितिमाथि नै प्रश्न खडा गरे।
‘वाइडबडीमा लेखा समितिले छानबिन गर्यो। तीन जना मन्त्रीलाई नैतिक रूपमा जिम्मेवार देखायो,’ बस्नेतले भने, 'त्यसमा दुई जना कांग्रेसका मन्त्री पर्नुभयो। जीवनबहादुर शाही परेको त निश्चित भयो। तर जीतेन्द्र देव पर्नुभयो कि तत्कालीन प्रधानमन्त्री शेरबहादुर देउवा पर्नुभयो भन्ने अहिले पनि लेखा समितिले छुट्याउन सकेको छैन। म त्यो छुट्याउन अनुरोध गर्न चाहन्छु।‘
वायुसेवा निगमले एयरबस कम्पनीका दुईवटा वाइडबडी खरिद गर्दा ४ अर्ब ३५ करोड ५६ लाख भ्रष्टाचार भएको लेखा समितिको निष्कर्ष छ।
