साउदी अरेबका युवराज मोहम्मद बिन सलमानका २० घन्टे भ्रमणका लागि आइतबार साँझ पाकिस्तानको इस्लामावाद आइपुगेका छन्। वैदेशिक मुद्रा सञ्चय गुमाउँदै गएको, आर्थिक घाटा बेहोरिरहेको र आफ्नो वित्तिय भविष्य सुरक्षित गर्न संघर्ष गरिरहेको पाकिस्तानले उनको भव्य स्वागत गरेको छ।
साउदी युवराजको स्वागत गर्न प्रधानमन्त्री इमरान खान आफैं विमानस्थलमा गएका थिए। उनले विमानस्थलबाट आफैंले गाडी चलाएर युवराजलाई प्रधानमन्त्री निवास ल्याइपुर्याए। युवराज सलमान आइतबार राति इमरानकै निवासमा बसे। पाकिस्तानमा विदेश पाहुना प्रधानमन्त्री निवासमा बसेको यो पहिलो पटक हो।
साँझको खाना खाइसकेपछि साउदी अरबले पाकिस्तानलाई २० अर्ब डलर दिने आर्थिक सहमतिमा हस्ताक्षर गरिएको छ।
त्यसमध्ये ग्वादर बन्दरगाहमा नयाँ तेल प्रशोधन केन्द्र बनाउन ८ अर्ब डलर खर्च गरिने बताएको छ।
सम्झौतामा हस्ताक्षरपछि छोटो प्रतिक्रिया दिँदै युवराज सलमानले पाकिस्तान-साउदी अरब सम्बन्ध थप गहिरो हुँदै जाने र यो पहिलो खुड्किलोमात्र भएको बताए।
‘हामी पाकिस्तानलाई नाइँ भन्न सक्दैनौं… हामी साउदी अरब र पाकिस्तानको नयाँ भविष्य कोरिरहेका छौं,’ उनले भने।
साउदी शाही भ्रमणलाई पाकिस्तानमा पछिल्लो पटक यति नै धुमधामसँग सन् २००६ मा लिइएको थियो जब साउदी शासक राजा अब्दुल्लाह बिन अब्दुलाजिजले परमाणु अस्त्र देशको भ्रमण गरेका थिए। १ हजार शक्तिशाली प्रतिनिधिका लागि इस्लामावादमा सयौं पाँचतारे कोठाहरू अग्रिम रुपमै बुक गरिएका छन्।
टर्कीको साउदी कन्सुलेटमा पत्रकार जमल खसोग्जीको हत्यापछि आलोचित बनेका युवराज सलामानले एसियाका पाँच देश गर्न लागेका छन्।
भारतले कश्मिरमा सुरक्षा फौजमाथिको घातक हमलामा पाकिस्तानलाई दोष लगाएपछि भारत र पाकिस्तानबीच तनाव चुलिएका बेला युवराज बिन सलमानको भ्रमण भएको हो।
पाकिस्तानको भ्रमण सकेर युवराज सलमान नयाँ दिल्ली आउनेछन्।