प्रमुख प्रतिपक्षी नेपाली कांग्रेसको अवरोध पछि आजको प्रतिनिधि सभा बैठक १५ मिनेट स्थगित भएको छ।
दिउँसो तीन बजे सुरू भएको बैठकमा कांग्रेस सांसदहरूले वेल घेराउ गरेपछि सभामुख कृष्णबहादुर महराले बैठक स्थगित गरेका हुन्।
बैठकको सुरूमा बोल्दै कांग्रेस सांसद प्रकाशमान सिंहले आफ्ना पूर्वसभापतिहरू गिरिजाप्रसाद कोइराला र सुशील कोइरालाका नाममा रहेका दुई अस्पताल संघीय सरकारमातहत राख्ने निर्णय मन्त्रिपरिषदबाट नभएसम्म संसदका कुनै कामकारबाही अघि बढ्न नदिने बताए।
उनले बोलिसकेपछि कांग्रेस सांसदहरू बेल घेराउ गर्न गए।
सांसदहरू देवप्रकाश तिमल्सेना र रंगमति शाही अग्रपंक्तिमा थिए। कांग्रेस सांसदहरूलाई बेलको बीचमा नपुग्दै मर्यादापालकले रोके।
त्यसपछि सांसदहरूले संसदको मर्यादा कायम गर्न भन्दै नाराबाजी गरे।
सांसद मीनेन्द्र रिजालले भने- बेलमा कहाँसम्म आउने भन्ने मर्यादापालकले तय गर्ने। यो सभामुखको आदेश हो कि गृहमन्त्रीको? सभामुखले पदको मर्यादा राख्नुपर्छ।
सांसद पार्वती चौधरीले तपाईंजस्तो कुर्सी बोकेर जाँदैनौं भनेर ब्यंग्य गरिन्। २०७१ सालमा संविधान सभा बैठक अवरोध गर्ने क्रममा तत्कालीन नेकपा माओवादीका सांसदहरूको कुर्सी नै उचालेका थिए।
कांग्रेसले नाराबाजी जारी राखेपछि सभामुख महराले बाँकी कारबाही अघि बढाउन चाहन्छु भने। त्यसपछि कांग्रेस सांसदले संसद विपक्षीको हुने भन्दै संसदको मर्यादा राख्न सभामुख महरालाई अनुरोध गरे।
सभामुखले पटक पटक उनीहरूलाई सिटमा गएर बस्न भने पनि कांग्रेस सांसदले घेराउ जारी राखेपछि बैठक स्थगित भएको हो।
यसअघि अरू सबै कार्यसूची हटाएर आजको बैठकमा चिकित्सा शिक्षा विधेयक पेस गर्ने र पारित गर्ने कार्यसूचीमात्र राखिएको थियो।
