सर्वोच्च अदालतले मुक्ति श्री सिमेन्टका नाममा विदेशबाट आएको पैसा झिकेको भए पनि फेरि बैंकमै राख्नु वा राख्न लगाउनू भन्ने आदेश दिएको छ।
यसअघि न्यायाधीश दीपकराज जोशीले उक्त पैसा झिक्न पाउने गरी दिएको आदेश खारेज गर्दै प्रधानन्यायाधीश चोलेन्द्र शम्शेर राणा र न्यायाधीश आनन्दमोहन भट्टराईको इजलासले मंगलबार पैसा पहिले कै अवस्थामा राख्न आदेश दिएको हो।
न्यायाधीश जोशीले दिएको आदेशपछि सुमार्गीले बैंकबाट रोक्का रहेको ७५ लाख अमेरिकी डलर झिकिसकेका छन्।
मंगलबारको आदेशमा उक्त रकम पूर्ववत अवस्थामा राख्न वा राख्न लगाउन भनिएको छ। मंगलबार आदेश भएपनि बिहिबार सर्वोच्चले यो रिटको लिखित आदेश सार्वजनिक गरेको हो।
त्यसमा न्यायाधीश जोशीको आदेशले निरन्तरता नपाएको र उक्त रकम कानुन बमोजिम नेपाल भित्र्याइएको हो कि हैन भन्ने विवाद कायमै भएकाले पूर्ववत अवस्थामा राख्न भनेको हो।
'उक्त आदेशले निरन्तरता नपाएको हुँदा र कानुन बमोजिम जे जस्तो कारबाही र प्रकृया अपनाउनुपर्ने हो, अपनाई विपक्षी नेपाल इन्भेष्टमेन्ट बैंकमा प्राप्त विवादित रकम पुस १० को आदेश पूर्वको अवस्थामा राख्नू/ राख्न लगाउनू भनी विपक्षीहरूलाई लेखी पठाउनू,' आदेशमा भनिएको छ।
मुक्तिश्री सिमेन्टका नाममा आएको ४ करोड ५० लाख अमेरिकी डलरमध्ये राष्ट्र बैंकले रोक्का गरेको ७५ लाख डलर बैंकमा थन्किएको थियो। सोविरूद्ध सुमार्गीले रकम फुकुवाका लागि अन्तरिम आदेश गराई पाउँ भन्दै निवेदन हालेका थिए।
