सत्तारुढ नेपाल कम्युनिस्ट पार्टी (नेकपा)को बुधबारको स्थायी समिति बैठकमा पनि अध्यक्षद्वय केपी ओली र पुष्पकमल दाहालले पेश गरेका राजनीतिक प्रतिवेदनको आलोचना गरिएको छ।
पार्टी केन्द्रिय कार्यालय धुम्बाराहीमा जारी पार्टी स्थायी समितिको सोमबार, मंगलबारको बैठकमाझै आज बुधबार पनि नेताहरूले पार्टी नेतृत्वको कार्यशैलीप्रति असन्तुष्टि जनाउँदै आफ्नो धारणा राखेका हुन्।
राजनीतिक प्रतिवेदनमाथिको आलोचना गर्ने क्रम जारी रहेको पार्टीका वरिष्ठ नेता झलनाथ खनालले जानकारी दिए। उनले राजनीतिक प्रतिवेदनलाई परिमार्जन गर्न पनि नेताहरूले नेतृत्वलाई सुझाव दिएको पनि बताए।
बैठकमा सुरेन्द्र पाण्डे, वर्षमान पुन, देव गुरुङलगायतका ८ जना नेताहरूले राजनीतिक प्रतिवेदनमा केन्द्रित रहेर छलफलमा भाग लिएका थिए।
विचार, राजनीति, भावी कार्ययोजनालगायतका विषयमा केन्द्रित भएर आजको बैठकमा पनि नेताहरूले आ–आफ्नो धारणा राखेका पार्टीका प्रवक्ता नारायणकाजी श्रेष्ठले जानकारी दिए।
गत शनिबार सुरू भएको पार्टी स्थायी समिति बैठकमा अध्यक्षद्वय ओली र दाहालले तयार पारेको संयुक्त राजनीतिक प्रतिवेदनमाथि सोमबारदेखि छलफल सुरू भएको हो।
छलफलमा भाग लिँदै नेताहरूले जनताको अपेक्षा अनुसार काम गर्न नसकेको भन्दै सरकारको र पार्टीलाई विधिसम्मत ढंगले अघि बढाउन नसकेको तथा एकीकरणको कामलाई पूर्णता दिन ढिलाइ गरेको भन्दै पार्टी नेतृत्वको चर्को आलोचना गरिरहेका छन्।
बैठक भोलि बिहान पनि बस्नेछ। भोलिको बैठकमा पनि बाँकी नेताहरूले आ–आफ्नो धारणा राख्ने प्रवक्ता श्रेष्ठले जानकारी दिए।
