सांसद पम्फा भुसालले काठमाडौँ उपत्यकामा घर भएर भाडा लिएका सांसदको सूचीमा आफ्नो नाम परेकोमा आश्चर्य व्यक्त गरेकी छन् ।
ललितपुर क्षेत्र नं ३ बाट निर्वाचित भुसालले आज प्रेस विज्ञप्ति जारी गर्दै आश्चर्य प्रकट गरेकी हुन्।
'उपत्यकामा घर भएर भाडा लिएका सांसदको सूचीमा मेरोसमेत नाम आएकामा म आश्चर्यमा परेको छु, संसद् सचिवालयमा मेरो घर भएको उल्लेख गरेको हुँ', विज्ञप्तिमा भनिएको छ।
भुसालले राजनीतिलाई आफूले निष्ठापूर्वक गरिने सामाजिक सेवाका रुपमा लिएको र तदनुरुप चार दशकदेखि क्रियाशील भएको हुँदा आर्थिक अनुशासनका बारेमा आफूसँग जोडेर उठाइने प्रश्नले धेरै नै गम्भीर बनाएको पनि उल्लेख गरेकी छन्।
विज्ञप्तिमा भनिएको छ, 'संसद् सचिवालयले एकमुष्ट तलबभत्ता बैंकमा राखिदिने र त्यसको विवरण नभएका कारणले घरभाडा त्यसमा राखिएको भन्ने मलाई जानकारी भएन, जानकारीपछि सचिवालयमा गएर सांसद हुँदा घरभाडावापत आएको सबै रकम कट्टा गर्न मैले अनुरोध गरिसकेको छु ।'
