शनिबारदेखि राजधानीमा जारी कांग्रेसको महासमिति बैठकले तेह्रौं महाधिवेशनदेखि हालसम्मको पार्टी राजनीति, सरकार सञ्चालन र चुनावमार्फत भोगेको पराजयको कारण खोजिरहेको छ। र, गुमेको साख फर्काउने बारेमा बहसमा जुटेको छ।
कांग्रेसको मूल समस्या र चुनौती के हो? अब के गर्नुपर्छ भनेर हामीले महासमिति सदस्यहरूलाई सोधेका थियौं। उनीहरूको भनाइ जस्ताको तस्तै:
खड्गबहादुर कार्की, सर्लाही
कांग्रेसको मुख्य समस्या भनेको यहाँभित्र एकता छैन। जबसम्म कांग्रेसका शीर्ष नेताहरू एकजुट हुँदैनन्, तबसम्म समस्या रहिरहन्छ। दुई तिहाइको कम्युनिस्ट सरकारसँग जुध्न नसक्नुको मूल कारण पार्टीभित्र एकता नभएरै हो। पार्टीभित्र र बाहिर जनताको निराशा त नेताहरूले देखेकै छन्। त्यसैले मलाई लाग्छ, यो महासमिति बैठकबाट नेताहरूले एकताको सन्देश दिनेछन्।
कांग्रेसका नेताहरूमा एउटा प्रवृत्ति छ – गाउँघर र विकट ठाउँमा नजाने। कार्यकर्ताको पिरमर्का नसुन्ने। गाउँ–गाउँमा गएर कार्यकर्तालाई प्रशिक्षित गराए पो कार्यकर्तामा ऊर्जा आउँछ। कम्युनिस्टसँग प्रतिपक्षमा बसेर लड्न नसक्ने अवस्था आउनु नेतृत्व र मुख्य नेताहरूकै कारण हो। भविष्य बनाउने हो भने नेताहरू मिलेर अगाडि कांग्रेसलाई एकताको सूत्रमा बाँध्नुपर्छ। त्यसमा नेतृत्व परिवर्तन आवश्यक छ भने फेरिनुपर्छ।
शम्भुहरि बास्तोला, सोलुखुम्बु
कांग्रेसको मुख्य समस्या कार्यकर्तालाई आकर्षण गर्ने क्षमतामा ह्रास हुँदै जानु हो। कार्यकर्ताको सशक्तिकरण खै? के कार्यक्रम ल्याएको छ कांग्रेसले कार्यकर्तालाई उत्साह दिने खालको? के आकर्षण छ र कांग्रेमा राजनीति गर्ने? आधार दिन सक्नुपर्छ। पराम्परागत भाषण र चुनावमा बाँडिने घोषणा–पत्रका आधारमा राजनीति गर्दै हिँड्ने मनस्थितिमा युवाहरू छैनन् भन्ने बुझ्न सक्नुपर्छ।
कांग्रेस कतै पनि हराएको छैन। यसको भविष्य समाप्त भएको पनि छैन। यो दिशाहीन, गन्तव्यविमुख भएको हो। नेतृत्व र ठूला नेताहरूको बेमेलका कारण कांग्रेस गन्तव्यविहीन बन्न पुगेको हो। नेतृत्व जसले गरे पनि वैचारिक रुपमा एकमत भए कांग्रेस दौडिन्छ। आफैंभित्रको अस्वस्थ प्रतिस्पर्धालाई नेताहरूले त्याग्नुपर्छ।
अर्को कुरा कांग्रेसले आफ्नो सामाजिक, राजनीतिक, सांस्कृतिक धरातल बिर्सिंदै गएको छ। यो तुरुन्त सच्याउनुपर्छ। हाम्रो धर्मसंस्कृतिमा देशीविदेशी तत्वले आक्रमण गरिरहेका छन्, कांग्रेसले यो आक्रमण जोगाउनुपर्छ। गणतान्त्रिक हिन्दु राष्ट्र एजेन्डामा जानुपर्छ।
मोहन लाल, कञ्चनपुर
कांग्रेसको भविष्य बिग्रेको छैन, खस्केको छ। नेता र नेतृत्वको कार्यशैलीले भविष्य खस्केको छ। अहिले जनताले कांग्रेसलाई एकजुट भएको हेर्न चाहेका छन्। गुट उपगुट त्याग्नुपर्छ। जनताको भावना समेटेर नयाँ–नयाँ कार्यक्रम ल्याउनुपर्छ।
कांग्रेसको भविष्य सुधार गर्नु छ भने गत वर्ष भएका तीन तहका चुनावको राम्रोसँग समीक्षा गर्नुपर्छ। कमी कमजोरी यी भए भनेर जनतासँग गएर माफ माग्नुपर्छ। नेताहरूले टिकट वितरण प्रणालीमा देखाएको रबैयाले पनि कांग्रेसलाई यो हालतमा पुर्याएको हो। कम्युनिस्टहरू दुई भएर चुनाव लडिरहेका छन् भन्ने जान्दाजान्दै त्यसलाई नजरअन्दाज गर्नु महाभूल थियो।
महासमितिपछि हामी महाधिवेशनमा जान्छौं। सबल, सक्षम र युवाहरूलाई समेटेर नयाँ नेतृत्व आउनुपर्छ भन्छौं। पुरानो नेतृत्वले कांग्रेस हाँक्दैन भन्ने त प्रष्ट भइसक्यो नि, हैन?
श्रीकृष्ण प्रसाईं, ताप्लेजुङ
कांग्रेस हराएको अवस्थामा छैन। कांग्रेस बहकाउमा हिँडेको चाहिँ हो। माओवादीको गोटी बन्यो कांग्रेस। २०६४ सालको चुनावमा गिरिजाप्रसाद कोइरालालाई जसरी माओवादीले झुलाएको थियो, शेरबहादुर देउवालाई पनि त्यसरी नै अल्मल्याइदियो।
भूतपूर्व पार्टी सभापति निर्वाचित भएको क्षेत्र चितवनको मेयरमा प्रचण्डकी छोरीलाई चुनाव जिताएपछि कांग्रेस ओह्रालो लाग्न थालेको हो। त्यो चुनावको समीक्षा नहुँदै ठेकेदारलाई चुनावमा समर्थन गर्न अह्रायो, कार्यकर्ताले भोट दिन मानेनन्। समग्रमा हेर्ने हो भने कांग्रेस अहिले पनि बलियो नै छ। तर, नेतृत्वको चरित्र सफा भएन। नेतृत्वले कार्यकर्ताको भावना बुझेन। कांग्रेस हराएको हैन, नेतृत्व बरालिएको हो।
अर्को, चुनावमा पराजित भएपछि केन्द्रीय नेतृत्वले हारको जिम्मेवारी लिन सकेन। तर, यी सबै कुरा महासमितिले टुंगो लगाउँछ भन्ने विश्वास छ। नेतृत्व परिवर्तनको बहस बेमौसमको बाजा बजाएजस्तो हो। चरित्र र कार्यशैली परिवर्तन गर्ने हो भने जोसुकैको नेतृत्व भए पनि कांग्रेस बलियो बन्छ।
अनुराधा स्वार, अछाम
कांग्रेसको समस्या भनेको गुट उपगुट र नेतृत्वको कार्यशैली हो। गुट उपगुट त्याग्दै नेतृत्वले सफा चरित्र अंगाल्ने हो भने कांग्रेसको भविष्य सुन्दर छ। टिकट वितरण प्रणालीमा जे जति भूल भएका थिए, त्यो महासमिति बैठकले पत्तासाफ गरोस्। गल्ती गर्नेलाई कारबाही होस्, असल कार्यकर्तालाई च्याप्न सकोस्।
मलाई लाग्छ कांग्रेस गुट उपगुट र आन्तरिक प्रतिस्पर्धामा अल्झिएको छ। एउटा चुनाव हार्दैमा कांग्रेसको भविष्य सकिएको भन्न मिल्दैन। कांग्रेस देशैभरि छ, बलियो नै छ। तर, गुट उपगुट र शीर्ष नेतृत्वको कार्यशैली बरालिएको छ।
आवश्यकता अनुसार नेतृत्व परिवर्तनको बहस उठ्नु स्वाभाविक हो। यही नेतृत्वमा हिजो सबै अँटाएका थिए भन्ने हामीले बुझ्नुपर्छ। कार्यकर्ता र जनताको भावनामा संवेदनशील बन्नुपर्छ। जथाभावी र अलोकप्रिय निर्णयबाट नेतृत्व मुक्त हुनुपर्छ।
वसन्त भट्टराई, मोरङ
कांग्रेस सकिएको पनि छैन, धराशयी बनेको पनि छैन, बरालिएको मात्रै हो। समग्रमा कांग्रेस अगाडि नै छ। प्राविधिक त्रुटिका कारण चुनाव हारियो। हामी ‘स्ट्रेन्थ’मै चुनाव लडेका हौं। पार्टीभित्र नीतिगत मतभिन्नता थिएन। गुट उपगुटका कारण चुनावमा पराजय भोग्नुपरेको हो।
मनमोहन अधिकारी प्रभानमन्त्री हुने बेलामा पनि कांग्रेस हारेकै हो। प्रचण्ड प्रधानमन्त्री हुने बेला पनि हारेकै हो। केपी ओली सरकार बन्नुअघि पनि हारियो। तर, हारबाट कांग्रेसले पाठ सिकेको छ। सिक्छ पनि।
शेरबहादुर देउवाबाहेक नेतृत्वमा जो–जो आए, उनीहरूले हारलाई सहज स्वीकारेर जनताकहाँ आफ्नो एजेन्डा सशक्त रुपमा लगे। नेतृत्वले आफ्नो क्षमता प्रदर्शन गर्न सक्यो। देउवाजीमा त्यो देखिँदैन। सांगठनिक रुपमा कांग्रेस बलियो नै छ अहिले पनि।
शेरबहादुरजीले कांग्रेसलाई अलोकप्रिय बनाउनु भयो। प्रहरीको नेतृत्व चयन गर्नेमा होस्, या निष्कलंक प्रधानन्यायाधीशलाई महाअभियोग लगाउने विषयमा होस्, देउवाजीले पार्टीलाई अचानोमा राख्नुभयो। आज कांग्रेसको भविष्य छैन भन्नेहरूको पछाडि तिनै आवाजहरू गुञ्जिने गरेका छन्। यस्तो अलोकप्रिय निर्णयबाट जनता दुःखी भए, भोट दिएनन्।
अर्को कुरा, टिकट वितरण प्रणालीमा नेतृत्व र नेताहरूको मनोपोली भयो। त्यसले गर्दा अन्तर्घात निम्त्यायो। २०–२५ ठाउँ अन्तर्घातकै कारण कांग्रेसले चुनाव हार्यो। गोजीबाट टिकट वितरण गरेपछिको असन्तुष्टि थियो त्यो।
महासमिति बैठक चलिरहेको छ। विधानमार्फत यी कुराको छिनोफानो हुनुपर्छ। पार्टीको अनुशासन समिति बलियो बनाउनुपर्छ। गल्ती गर्नेलाई कारबाही हुनुपर्छ। अनुशासन समितिमा नेतृत्वबाट हुने ‘मनोनित’लाई हटाउनुपर्छ। अनुशासन समिति निर्वाचनबाटै चयन हुनुपर्छ। कुनै पनि पदाधिकारीहरू मनोनित हैन, निर्वाचित हुनुपर्छ। यी विषय महासमितिले टुंग्याउँछ। कांग्रेस फेरि बलियो भएर उदाउँछ।
भीम पराजुली, पर्यवेक्षक
महासमिति बैठकले नेता, नीति, विचार, दृष्टिकोणमा आमूल परिवर्तन ल्याउनुपर्छ। जनताकेन्द्रित र विकास केन्द्रित राजनीतिलाई अगाडि बढाउनुपर्छ। युवाहरूलाई नेतृत्व तहमा अगाडि बढाउनुपर्छ। र, वरिष्ठ नेताहरू अभिभावक भएर बस्नुपर्छ।
पछाडि पारिएका सबैै वर्ग, तह, तप्कालाई अधिकारसम्पन्न बनाउने नीति अख्तियार गर्नुपर्छ। यसरी अगाडि बढ्यो भने कांग्रेसको भविष्य उज्जवल हुन्छ।
अहिले नेताहरूको मानसिकतामा परिवर्तन आवश्यक छ। कांग्रेस पुरानो ढर्रामा चल्दैन। नेतृत्वको मानसिकतामा परिवर्तन, नीतिमा परिवर्तन हुनुपर्छ। बिपीले अगिंकार गरेका समाजवादी नीतिलाई परिस्कृत गरेर कांग्रेस अगाडि बढ्नुपर्छ। बिपीले प्रतिपादन गरेको समाजवादी नीतिलाई परिस्कृत गरेर आर्थिक समृद्धि र विकासलाई अगाडि बढाउनुपर्छ। वरिष्ठ नेताहरूले आफू अभिभावक भएर युवापुस्तालाई नेतृत्व हस्तान्तरण गर्नुपर्छ।
हामीले उठाउँदै आएको नीति–विचार नै ठिक भएन। यसमा हाम्रा कामहरूले पनि प्रभाव पारेको छ। सरकारले गरेको गल्तीहरूलाई हामीले जनतामाझ लैजान सकेनौं। युवा संगठन कमजोर छ, युवा नेतृत्व आउन सकेको छैन। समयमा भ्रातृ संगठनको नर्वाचन गर्न सकिएको छैन। अहिलेको नेतृत्वले भोलिको परिस्थितिसँग लड्न सक्दैन भन्ने मेरो बुझाइ छ।
कांग्रेसले टिकट वितरणमा आलोचना खेपेको छ। यसमा केन्द्रीय नेतृत्वको जिम्मेवारी प्रमुख हो। कांग्रेसले कतै नजित्दा मैले विराटनगर महानगरमा जितेको हुँ। व्यक्तिगत छविले चुनाव जितेको थिएँ।
रमेश धमला, धादिङ
महासमिति बैठक भनेको पार्टीको एउटा महत्वपूर्ण अंग हो। विशेषगरी विधानलाई परिमार्जन गर्ने र पार्टीभित्र रहेका कमीकमजोरी सच्याउने सन्दर्भमा महत्वपूर्ण मानिन्छ। महासमिति पार्टीको माथिल्लो तह हो। पार्टीलाई संघीय संरचना अनुरुप कसरी निर्माण गर्ने भन्ने सन्दर्भमा मस्यौदा समितिले बनाएको विधानलाई केन्द्रमा राखेर छलफलमा जुटेका छौं।
सबै तहका जनताले कांग्रेसलाई मेरो पार्टी भन्ने विश्वास कसरी बनाउने भन्नेमा हामी केन्द्रित छौं।
केन्द्रीय समितिका नेताहरु स्वतः प्रतिनिधि हुने परम्परागत चलन थियो, त्यो परिमार्जन गर्न लागेका छौं। उहाँहरूलाई पनि जनताको बीचमा लाने गरी प्रस्ताव अघि बढाउनुपर्छ।
हिमाल, पहाड, तराईमा बसोबास गर्ने मानिसले राजनीतिक, आर्थिकलगायतका दस्तावेज र पार्टी विधान पढ्दै गर्दा यो हाम्रो पार्टी हो भन्ने र अहिले १४/१५ वर्षका युवाहरू जो २०७९ सालको निर्वाचनमा मतदाता बन्दै गर्दा उहाँहरूले छान्न सक्ने पार्टीको रुपमा कांग्रेसलाई व्यवस्थापन गर्ने हाम्रो तयारी हुन्छ।
लामो समयदेखि त्याग गरेका नेताहरू र युवालाई सम्मान गर्दै युवा पुस्ताहरूको प्रतिनिधित्व घनिभूत रुपमा कसरी सहभागिता गराउने भन्ने मुद्दा नै अहिलेको मुद्दा हो। पार्टीलाई थप सुधार गर्नका लागि प्रविधिमा विश्वास गर्न सक्ने नेता–कार्यकर्ता तयार बनाउनुपर्यो।
संविधानलाई पालना गर्नुपर्यो। प्रतिपक्षको भूमिकालाई जिम्मेवार, जवाफदेही भूमिकाको रुपमा प्रस्तुत गर्न सक्नुपर्छ। स्थानीय तहमा जसले नेतृत्व दिइराख्नु भएको छ, उहाँहरूले सुशासन दिन सक्ने जिम्मेवार नेताको रुपमा उहाँहरूलाई स्थापित गराउनुपर्छ। अनि पार्टी सुध्रन्छ।
नवलकिशोर यादव, धनुषा
कांग्रेस ‘मास वेश’ पार्टी हो। देशभरका साथीहरूले नयाँ संविधान कार्यान्वयन कांग्रेसले गर्छ भन्ने विश्वास राखेका छन्।
संविधानमा रहेका कमीकमजोरी तथा त्रुटि कांग्रेसले नै सच्याउँछ भन्ने विश्वास छ। पार्टीलाई अहिलेको अवस्थाबाट माथि उकास्न महासमिति बैठक उद्घाटनमा पनि नेताहरुले विभिन्न उपाय ल्याएका छन्।
सबै नेताहरू एक हुनुपर्छ। नेपाली कांग्रेसको भन्दा सुन्दर विधान अरु कुनै पार्टीको छैन। पार्टीभित्र ठूलो विवाद छैन, केही भए सल्टन्छ। शेरबहादुर दाइ र रामचन्द्र दाइबीचको विवाद हिजो सल्टिएको जस्तो मलाई लाग्छ, अब पार्टी सुध्रन्छ।
सञ्जयकुमार यादव, धनुषा
नेपाली कांग्रेस चुनावमा पराजित हुनुको कारण पार्टीभित्रको गुटबन्दी हो। अबको नेपाली कांग्रेसले समग्र जनतालाई समृद्ध बनाउने, देश विकास गर्ने उद्देश्यका साथ नयाँ व्यक्ति युवाले पार्टीको नेतृत्व लिनुपर्छ। महाधिवेशन आउन डेढ वर्ष छ। सभापति शेरबहादुर देउवा दाइले पार्टीलाई जुन ढंगले चलाउनुपर्ने, जुन खालको नेतृत्व हुनुपर्ने थियो, त्यो देखिएन। कांग्रेस जनताको ढुकढुकी हो। नेपाली जनताको हितमा लोकतन्त्रको वकालत गर्ने पार्टी हो। पार्टीमा सफल नेतृत्व गर्ने नेता जबसम्म हुँदैन, तबसम्म पार्टी सुध्रदैन।
हामीलाई आशा र विश्वास छ, महासमितिमा भाग लिनुभएका सबैले पार्टीलाई एक सुत्रमा बाँधेर कसरी अघि लैजाने भन्ने सुझाव दिनुपर्छ। भारतमा युवा नेतृत्व आएको छ। संसारमा युवाहरू पार्टी र देश अघि बढाउँदै छन्। आउँदो महाधिवेशनबाट पार्टीको नेतृत्व सक्षम युवाको हातमा जानुपर्छ।
क्रियाशील र गुटबन्दीका विवाद बिर्सेर जनताको हक हितमा काम गर्न सकियो भने कांग्रेस देशको ठूलो पार्टीको रुपमा आउनेछ।
मोहम्मद निजाउज्दिन, काठमाडौं
गुट उपगुटले पार्टीलाई कमजोर बनाएको छ। संगठनलाई मतबुत बनाएर सबैले योगदान गर्नुपर्छ। आगामी समय एकताबद्ध भएर अघि बढ्नुपर्छ। महासमितिले पार्टी सुध्रेर अघि जान्छ भन्ने सन्देश दिन्छ।
युवा र जनताले राजनीतिक बुझिसकेका छन्। कम्युनिस्ट सरकारले केही गर्न सकेको छैन। महंगी बढेको छ, बलात्कार, हत्या हिंसा बढेको छ। तर, सरकारले केही गरेको छैन। अन्तरद्वन्द्व हटाएर पुनः कांग्रेसलाई एक नम्बरको पार्टी बनाउनुपर्छ।
देवमणि काप्री, सर्लाही
केन्द्रमा बस्ने नेताहरू अलि जनमुखी होउन्। जनताप्रति, गाउँको कुना–कुनामा बस्ने, हलो जोत्ने किसानप्रति, घाँस काट्ने जनताप्रति उत्तरदायी बन्नुपर्छ। दलित, महिला, उत्पीडित, पिछडिएका वर्गहरु छन्, तिनीहरूमाथि पार्टीको ध्यान आकर्षित होस्।
केन्द्रमा बसेर सत्ता, भारत, अमेरिकाभन्दा जनताप्रति नेताहरूको ध्यान जाओस्। जनताको कसरी उत्थान हुन्छ र प्रजातन्त्रको महत्व जनताले अझै बुझ्न सकेका छैनन्। प्रजातन्त्रले जनतालाई कुनै राहत दिएन। पिछडिएको जाति कहाँ छ, त्यहाँसम्म पार्टी पुग्नुपर्छ। गाउँमा बस्ने कार्यकर्तालाई तागत दिनुपर्छ।
पार्टीले कार्यकर्तालाई सुरक्षा र शान्ति दिन सकेन। यतिञ्जेल दिएन पनि। माआवादीले नेता–कार्यकर्तालाई सुतेको ठाउँबाट उठाएर काट्दा पनि पार्टीले हेरेन। शेरबहादुरजी, गिरिजाजी प्रधानमन्त्री हुनुहुन्थ्यो, तैपनि कार्यकर्ताले सुरक्षा पाएका थिएनन्।
कुर्सीको लुछाचुँडी, तँ माथि कि म माथि भन्ने नेताहरूको कार्यशैलीले पार्टी तल परेको हो। कांग्रेसका भोटर ओझेलमा परेका छन्। छातीमा हात राखेर म कांग्रेस कार्यकर्ता भन्ने सक्ने आँट अझै जनतामा छैन। किनभने पार्टीले सुरक्षा दिन सकेन।
सीता राई, उदयपुर
पार्टीलाई दह्रो बनाउनुपर्छ। वडा तहदेखि माथिल्लो तहसम्म राम्रो विधान बनाउनुपर्छ, सबैलाई पच्नेखालको।
पार्टीलाई सुधार्न वडाबाट चुनिएर नेताहरू आउनुपर्छ। एक व्यक्ति एक पद हुनुपर्छ। म अहिले महासमिति छु भने अब सधैं म महासमिति भइराखेर अरु कहाँ जाने? पार्टीले संगठनमा काम गर्नेलाई मूल्यांकन गर्नुपर्छ।
केन्द्रमा गुटबन्दी छ। जिल्ला, क्षेत्रमा गुटबन्दी गयो। नेताहरूले आफ्नो र नेताको चाकडी गर्नेलाई टिकट दिएपछि हारेको हो। स्थानीयले छानेको नेतालाई टिकट दिनुपर्छ। टिकट वितरणमा अझै पनि केन्द्र हावी भयो भने पार्टीले हार्छ।
देवप्रकाश खतिवडा, उदयपुर
महासमिति बैठकबाट कांग्रेस सुधार्ने अपेक्षा छ। संगठन पहिले बिग्रिएको थियो, अब नयाँ विधानअनुसार गठन गर्नुपर्ने छ। पार्टीको संगठन राम्रो होस्, नेताहरू मिलुन्, वडादेखि केन्द्रसम्म कांग्रेस देशभर राम्रोसँग चलोस्।
निर्वाचनबाट नै नेताहरू पार्टीको नेतृत्वमा आउनुपर्छ। मनोनितले संगठनलाई चुस्त बनाउँदैन। नेताहरूको अल्छीपनले गर्दा र सबैलाई मिलाउन नसक्दा पार्टी एक नम्बरको हुन सकेन। अब सबै मिलेर अर्को चुनावमा पार्टीलाई ठूलो पार्टी बनाउन लाग्छौं।
विनोद बस्नेत, सभापति सोलोखुम्बु
यो महासमिति बैठकले संगठनको संरचनामा सुधार गर्नेछ। विधानलाई संघीय संरचनामा गएपछि तहगत रुपमा ती संगठनलाई जिम्मेवार बनाउँछौं।
शक्ति र जिम्मेवारीको विकेन्द्रीकरण विधानले गरेपछि संगठनका सदस्यहरूमा जिम्मेवारी बढ्नेछ र संगठन चुस्त–दुरुस्त अनि बलियो बन्छ।
अहिलेको सत्ताबाट भएका विकृतिपूर्ण निर्णयहरूलाई जनताको बीचमा लैजानुपर्छ। र, सुधारसहितको ‘हाम्रो १५ वर्षे आर्थिक नीति’बारे जनतलाई बुझाउन जरुरी छ।
अर्को निर्वाचनमा विजय हासिल गर्ने गरी नीति र संगठन तयार गर्ने दिशा महासमितिले दिनेछ।
चुनावमा भएको विजय र पराजयबाट माथि उठेर अब हाम्रो ध्यान सशक्त प्रतिपक्षले उठाउनुपर्ने मुद्दामा केन्द्रित हुनुपर्छ, जसले संगठनलाई पनि राम्रो बनाउँछ।
राजकुमार नकर्मी, काठमाडौं
यो महासमिति बैठकपछि कांग्रेसले नयाँ जीवन पाउँछ। कांग्रेस सुध्रिएर संगठित र विस्तारित रुपमा अघि बढ्नुपर्छ, नभए झन् पार्टी बिग्रन्छ।
पार्टीभित्र ठूलो समस्या छ भन्ने हामीलाई लाग्दैन। पार्टीभित्रको संरचनाले काम गरिराखेको छ। परिमार्जन आवश्यक भएर नै विधान हामी बनाउँदैछौं। अहिलेसम्म हाम्रो प्रदेश समिति छैन।
अब बनाउँछौं। त्यसपछि हामी थप उत्साहित हुन्छौं। यो महासमितिले नयाँ जोस र जाँगर ल्याउँछ। युवालाई प्राथमिकता नदिए पार्टीलाई सुख पनि छैन। युवालाई सम्बोधन गरेर पार्टीलाई अघि बढाउनुपर्छ। परिवर्तन र परिमार्जन भएर पार्टीलाई अघि बढाउन युवा चाहिन्छ।
