नेकपा (माओवादी केन्द्र) का अध्यक्ष गोपाल किराँतीले सत्तापक्ष नेकपालाई फुटाएर भए पनि जनयुद्धको बाँकी कार्यभार पूरा गर्ने घोषणा गरेका छन् ।
आइतबार राजधानीमा नेकपा (माओवादी केन्द्र) ले पार्टीको आठौं महाधिवेशनको बारेमा जानकारी दिनको लागि आयोजना गरेको पत्रकार सम्मेलनमा बोल्दै अध्यक्ष किराँतीले सो कुरा बताएका हुन्। उनले सत्तारुढ दल नेकपालाई फुटाउने आफूहरूसँग राजनीतिक अधिकार रहेको जिकिर गरे ।
उनले भने,‘पूर्व माओवादीका तर्फबाट केही साथीहरू खान पाइन्छ भनेर हाँस्दै जानुभयो, केही साथीहरू बाध्यतामा परेर सत्तापक्ष नेकपा बन्नुभयो, जनयुद्धको कार्यभार र आफ्नो दायित्वलाई भुलेर क्रान्तिको कार्यभार अधुरो छोडेर धोका दिनुभयो, प्रचण्डलाई त हामीले डाँकानै भन्न बाध्य भयौं, उहाँ धोकेवाज बन्नुभयो, हिजोको दिनहरूमा उहाँलाई हामीले नेता बनाएका हौं, माओवादी सिद्धान्तलाई त्यागेर एमालेसँग विलिन हुनुभयो, सत्तापक्ष नेकपाका असली कम्युनिस्ट कार्यकर्ताहरू हाम्रो पार्टीमा आउनुहुन्छ, हामी महान जनविद्रोह सम्पन्न गर्छौं।’
प्रचण्डभन्दा बादल राष्ट्रवादी नेता भएको उल्लेख गर्दै उनले आफूहरूले बादललाई महान जनविद्रोहमा आउनको लागि आग्रह गरिसकेको जनाए ।
उनले थपे,‘अझै पनि जनताका अधिकार स्थापित भएका छैनन्, तपाईंलाई हामी नेता स्वीकार्न तयार छौं, तपाईलाई प्रधानमन्त्रीको रूपमा अघि सारेर वर्तमान सरकारलाई सडकबाटै ढाल्न तयार छौं, तपाई जत्तिको राष्ट्रभक्ति नेता र युद्धको कुशल कमाण्डर ईमान्दर सिपाइ यस्तो नालायक सरकारमा बस्न सुहाउँदैन भनेका छौं, उहाँले जवाफ पठाउनुभएको छैन।’