नेपाली कांग्रेसका सभापति शेरबहादुर देउवाले महासमिति बैठकले पार्टीलाई नयाँ गति दिने बताएका छन्।
काठमाडौंको रामशाहपथस्थित सिंहदरबारअगाडि यगम्बर पार्टी प्यालेसमा शनिबार महासमिति बैठक उद्घाटन गर्दै सभापति देउवाले महाधिवेशनपछि पार्टीमा नवीन उत्साह आउने विश्वास ब्यक्त गरे।
‘महासमिति बैठकले पार्टीभित्र एकतालाई थप बलियो बनाउँछ,’ सभापति देउवाले भने, ‘नवीन उत्साहसहित अघि बढ्छौं। एक नम्बरको पार्टी बन्नुछ।’
पार्टीलाई विधिसम्मत चलाउन नसक्दा चुनावमा पराजय हुने जस्ता कमजोरी भएको देउवाको भनाइ छ। सभापति देउवाले लिखित मन्तब्य राख्दै नेतृत्वको बिरोध गर्नेहरुले सरकारको नराम्रा कामको पनि बिरोध गर्नुपर्ने बताए।
‘ओलीको खिलापमा माधव नेपालले जति त बोल्ने हिम्मत त गर्नुस्,’ सभापति देउवाले प्रश्न गरे, ‘म ठीक नभए ओली ठीक छन् त?’
लिखित मन्तब्य राखेकोबारे प्रष्टिकरण दिँदै देउवाले भने, ‘शेरबहादुरले बढी बोल्यो भन्नुहोला भनेर लेखेरै ल्याएको छु।’
सभापतिले बोल्ने बेला हल्लाखल्ला भएपछि शान्त रहन आग्रह गर्दै देउवाले भने, ‘हल्ला नगर्नुस् न प्लिज। चित्त नबुझे भोलि कमेन्ट गर्नुहोला, सुन्दै नसुने के टिकाटिप्पणी गर्नुहुन्छ?’
कञ्चनपुरकी बालिका निर्मला पन्तको बलात्कार-हत्यामा संलग्न अपराधीलाई कारबाहीको दायरामा ल्याउन नसकेको भन्दै देउवाले नेकपा अध्यक्ष केपी शर्मा ओली नेतृत्वको सरकारको आलोचना गरे।
‘सरकारको गतिविधि हेर्दा निर्मलाको हत्यारालाई बचाउन खोजेजस्तो देखिन्छ,’ उनले भने। महासमिति बैठकमा भाग लिन देशभर तथा विभिन्न देशस्थित जनसम्पर्क समितिबाट गरी कूल एक हजार सात सय महासमिति सदस्य र पर्यवेक्षक काठमाडौंमा छन्।
महासमिति सदस्यको सम्मानमा सभापति देउवाले आज यगम्बर पार्टी प्यालेसमा रात्रीभोज दिँदैछन्। रात्रीभोज सुरु हुनुपूर्व करिव एक घण्टा बन्दसत्र चल्ने कांग्रेस मुख्यसचिव कृष्णप्रसाद पौडेलले बताए। बन्दसत्रमा आर्थिक, राजनीतिक दस्तावेज महासमिति सदस्यलाई अध्ययनका लागि दिने कार्यक्रम छ।