श्रीलंकाका प्रधानमन्त्री महिन्दा राजापाक्षेले पदबाट राजीनामा दिएका छन्।
शनिबार राजापाक्षेले आफ्नै निवासमा राजीनामा पत्रमा हस्ताक्षर गरेका अन्तर्राष्ट्रिय सञ्चार माध्यमले जनाएका छन्।
राजापाक्षेको पार्टीका एक जना सांसद शेहान सेमासिङ्घेले वक्तव्य दिएर उनले राजीनामा दिएको बताए।
वक्तव्यमा उनले आगामी दिनमा आफ्नो पार्टीले सशक्त र रचनात्मक प्रतिपक्षको भूमिका खेल्ने उल्लेख गरेका छन्। अहिलेको राजनीतिक द्वन्द्व अन्त्य गर्नका लागि संसदीय निर्वाचन माग गर्ने आफूहरूको मुख्य मुद्दा हुने उनको भनाइ छ ।
प्रधानमन्त्री राजापाक्षेको राजीनामासँगै झन्डै सात हप्तादेखि गहिरिएको यो टापू राष्ट्रको राजनीतिक संकट संग्लिने अपेक्षा गरिएको छ।
यसअघि बिहीबारमात्र श्रीलंकाको सर्वोच्च अदालतले संसद विघटन गर्ने राष्ट्रपति मैत्रीपाला सिरिसेनाको कदम अवैधानिक भएको आदेश दिएको थियो। त्यसभन्दा पहिले मंसिर १७ गते एक अर्को अदालतले राजापाक्षेलाई प्रधानमन्त्रीको रूपमा काम नगर्न भनेको थियो।
गत अक्टोबर २६ मा राष्ट्रपति सिरिसेनाले प्रधानमन्त्री रनिल विक्रमासिंघेलाई हटाएर पूर्वराष्ट्रपति राजापाक्षेलाई नियुक्त गरेपछि यो टापु राष्ट्रमा राजनीतिक संकट सुरू भएको थियो।
राष्ट्रपतिले बर्खास्त गरे पनि आफू वैधानिक प्रधानमन्त्री भएको दाबी गर्दै विक्रमासिंघेले पद छोड्न इन्कार गरेका थिए।
झन्डै २ महिनाको शक्ति संघर्षपछि पूर्वराष्ट्रपति राजापाक्षे पछि हटेका हुन्।
