संवैधानिक परिषदको मंगलबार साँझ बोलाइएको बैठक पनि बस्दै नबसी स्थगित भएको छ।
परिषदका अध्यक्ष प्रधानमन्त्री केपी शर्मा ओली र विपक्ष दलका नेता एवम् नेपाली कांग्रेसका सभापति शेरबहादुर देउवा अनुपस्थित भएपछि बैठक बस्दै नबसी स्थगित भएको हो।
प्रधानमन्त्री ओली र विपक्ष दलका नेता देउवाको कार्य व्यस्तताका कारण बैठक पुस ५ गते पुनः बस्ने गरी स्थगित भएको राष्ट्रिय सभाका अध्यक्ष एवम् परिषदका सदस्य गणेशप्रसाद तिमिल्सिनाले जानकारी दिए।
कांग्रेस महासमिति बैठक समेत परेकाले बैठक पुस ५ गतेसम्मका लागि पर सार्नु परेको पनि अध्यक्ष तिमल्सिनाले स्पष्ट पारे। प्रधानन्यायाधीश सिफारिस गर्न बोलाइएको परिषदको बैठक यस अघि पनि दुई पटक स्थगित भएको थियो।
प्रधानन्यायाधीश रिक्त हुनु एक महिना अघि नयाँको नाम सिफारिस गर्नुपर्ने संवैधानिक व्यवस्था छ। प्रधानन्यायाधीश ओमप्रकाश मिश्र उमेरहदका कारण पुस १७ गते अवकाश लिँदैछन्।
परिषदको बैठकमा नयाँ प्रधानन्यायाधीशका लागि सर्वोच्च अदालतका वरिष्ठ न्यायाधीशद्वय चोलेन्द्र शमशेर राणा र दीपकराज जोशीको नाम न्याय परिषदले पठाएको छ। जोशी यस अघि पनि संसदीय सुनुवाइ विशेष समितिबाट अस्वीकृत भएका थिए।
