कर्णाली प्रदेशको सुर्खेतस्थित मध्यपश्चिम विश्वविद्यालयका विद्यार्थीलाई प्रशासनले पक्राउ गरेको भन्दै सत्तारुढ र प्रमुख प्रतिपक्षी दलका विद्यार्थी संगठनले रिहाइको माग गरेका छन्।
विश्वविद्यालयमा उत्पन्न समस्या विद्यार्थीसँगको वार्ताबाट टुंग्याउनुको सट्टा प्रहरी लगाएर विद्यार्थी गिरफ्तार गरिएको भन्दै विद्यार्थी संगठनहरूले पक्राउ परेका नेता नछाडे आन्दोलन गर्ने चेतावनी दिएका हुन्।
नेविसंघका केन्द्रीय सदस्य विवेक आचार्यलाई नेपालगञ्जबाट, अनेरास्ववियु क्रान्तिकारीका केन्द्रीय सदस्य देवीचन्द्र उपाध्यायलाई काठमाडौंबाट र अनेरास्ववियुका नेता तथा मध्यपश्चिम विश्वविद्यालय स्ववियु सचिव भरत शाहीलाई सुर्खेतबाट प्रहरीले अपहरणको शैलीमा पक्राउ गरेको भन्दै विद्यार्थी संगठनले रिहाइको माग गरेका हुन्।
स्ववियु सभापति झक्कबहादुर शाही, कोषाध्यक्ष सुशील भट्ट र नेविसंघका मोहन रानालाई आज प्रहरीले पक्राउ गरेकोमा उनीहरूलाई रिहाइ गर्न विद्यार्थी संगठनका नेताहरूले संयुक्त विज्ञप्तिमार्फत् आग्रह गरेका छन्।
पक्राउ परेका विद्यार्थी रिहाइ नगरे आन्दोलन गर्ने नेविसंघ सभापति नैनसिंह महर, अनेरास्ववियु क्रान्तिकारीका अध्यक्ष रञ्जित तामाङ र अनेरास्ववियुका कार्यवहाक अध्यक्ष रश्मी आचार्यले विज्ञप्तिमार्फत् चेतावनी दिएका हुन्।