चिकित्सकको सल्लाहअनुसार सार्वजानिक कार्यक्रममा भाग नलिएका प्रधानमन्त्री केपी शर्मा ओली सोमबारबाट सार्वजानिक कार्यक्रममा देखिएका छन्।
नेकपाका अर्का अध्यक्ष पुष्पकमल दाहालका पुत्र प्रकाश दाहालको प्रथम स्मृति दिवसमा प्रधानमन्त्री ओली पनि सहभागी भए।
खुमलटारमा आयोजित प्रकाश दाहाल स्मृति स्मारिका विमोचन कार्यक्रममा सहभागी प्रधानमन्त्री ओलीले केहीबेर भाषणसमेत गरे।
छाती र निरन्तर खोकीको समस्या देखिएपछि कात्तिक १२ गते महाराजगञ्जको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचारका लागि भर्ना भएका ओली कात्तिक १६ गते डिस्चार्ज भएका थिए। त्यसयता उनी सार्वजनिक कार्यक्रममा सहभागी भएका थिएनन्।
बालुवाटारमा आराम गर्दै आएका प्रधानमन्त्री ओलीले निवासबाटै काम गरेका थिए। प्रधानमन्त्री तीन सातादेखि सिंहदरबार पनि गएका छैनन्।
बिरामी भएर आराम गरिरहेका प्रधानमन्त्री ओली सोमबार सार्वजानिक कार्यक्रममा देखिएका हुन्। कार्यक्रममा प्रधानमन्त्री ओलीले अल्पायुमै प्रकाशको निधनले भएको र त्यसले पीडा दिइरहेको बताए।
‘पीडा भइरहन्छ। प्रकाशको सम्झना आइरहन्छ। परिवारले संयमतासाथ जीवन अघि बढाउनुपर्छ,’ प्रधानमन्त्री ओलीले भने।
प्रधानमन्त्रीले ओलीले करिब दश मिनेट भाषण गरेका थिए।