भारतीय प्रधानमन्त्री नरेन्द्र मोदी शनिबार टापु राष्ट्र माल्दिभ्स गए। नवनिर्वाचित राष्ट्रपति मोहम्मद इब्राहिम सोलिहको सपथ समारोहमा भाग लिन मोदी माले पुगेका हुन्। सन् २०१४ मा प्रधानमन्त्री बनेका मोदी छिमेकी माल्दिभ्स पहिलो पटक गएका हुन् भने भारतीय प्रधानमन्त्रीले ७ वर्षमा माल्दिभ्सको भ्रमण गरेका हुन्। मोदी कुनै विदेशी नेताको सपथ ग्रहणमा पुगेको पनि यो पहिलो पटक नै हो।
भारतीय सञ्चारमाध्यमले सोलिहको विजयसँगै हिन्द महासागरको महत्वपूर्ण यो टापु राष्ट्र चीनको प्रभावबाट बाहिर आएको बताएका छन्।
दुई महिनाअघि भएको चुनावमा निकै शक्तिशाली मानिएका चीननिकट राष्ट्रपति अब्दुल्ला यामिन आश्चर्यजनक रूपमा पराजित भएका थिए।
सोलिहलाई पूर्वराष्ट्रपतिहरू मोहम्मद अब्दुल गैयुम र मोहम्मद नसिदको समर्थन थियो। शनिबारको सपथ समारोहमा उनीहरू दुबै जना उपस्थित थिए। यी दुई पूर्वराष्ट्रपतिको बीचमा बसेका भारतीय प्रधानमन्त्री मोदी।
माल्दिभ्सको आन्तरिक मामिलामा विगतमा निकै प्रभावी रहेको भारतले सन् १९८८ मा सम्भावित सत्ताविद्रोह दबाउन सेना र युद्धपोत पठाएको थियो।
पछिल्ला वर्षहरुमा राष्ट्रपति यमीनमाथि चीनसँग नजिकिएको आरोप लाग्दै आएको थियो। माल्दिभ्सका ठूला पूर्वाधार परियोजनाका लागि चीनले करोडौं डलर ऋण प्राप्त गरेका थिए।
नयाँ राष्ट्रपति सोलिहले देश आर्थिक संकटमा रहेको बताएका छन्।
'मैले सपथ लिने बेलामा देशको अर्बौं रूपैयाँ हराइरहेको छ, कति पैसा हराइरहेको छ भन्ने पनि हामीलाई ठ्याक्कै थाहा छैन,' सलाहले भने, 'यो रूपैयाँ पाउन हामीले विदेशी सहयोग चाहिन्छ।'
मोदीले सलाहलाई माल्दिभ्सको सामाजिक र आर्थिक दीगो विकासका लागि सहयोग गर्ने वचन दिएका छन्।