नेपाल कम्युनिष्ट पार्टी (नेकपा) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड‘ले प्रधानमन्त्री, आफू र अन्य नेताहरूको विदेश भ्रमणले पनि पार्टी एकता टुंग्याउन ढिलाइ भएको बताएका छन्।
तीन महिनाभित्र पार्टीको तल्लो कमिटीसम्म एकता गरिसक्ने तय गरे पनि प्राविधिक कारणले ढिलाइ भएको उनले बताए।
‘तपाईंहरूलाई नेताहरूमा विवाद भएर, अन्तरविरोध परेर पार्टी एकता नटुंगिएको हो कि भन्ने लागेको हुनसक्छ,’ दोलखाको चरिकोटमा शनिबार दाहालले भने, ‘विवादका कारण ढिलो भएको होइन। प्राविधिक कारण छन्। यो बीचमा धेरै नै विदेश भ्रमण भए। प्रधानमन्त्रीको, मेरो र अरु सिनियर नेताहरूको। माधव नेपालजी त अहिले पनि बाहिरै हुनुहुन्छ।’
पार्टी एकता कार्यदलले पनि छिटो काम गर्न नसकेको उनले बताए।
‘पछिल्लो चरण प्रधानमन्त्रीजीको स्वास्थ्यमा समस्या भएपछि पनि केही दिन ढिलो भयो। हिजो (शुक्रबार) बेलुकी दुई जना अध्यक्ष बसेर मंसिर ६ गते सचिवालय बैठक बस्ने, प्रदेश कमिटी टुंग्याउने, केन्द्रीय समितिका कार्यविभाजनको प्रस्ताव टुंग्याउने र जिल्ला कमिटीका पदाधिकारी टुंग्याउने ढंगले जाने कुरा भएको छ,’ दाहालले भने।
सचिवालय बैठकपछि स्थायी समिति बैठक बस्ने उनले बताए। सो बैठकले कार्यविभाजनको प्रस्तावलाई अन्तिम रूप दिएपछि केन्द्रीय समितिबाट अनुमोदन गराउने तयारी रहेको उनले बताए।
‘कमिटी बनाउन विवाद, झमेला भएर ढिलाइ भएको होइन,’ दाहालले भने, ‘थोरै ढिलो भयो, नमीठो त भएको छ। तर विवाद छैन।’
