प्रदेश नम्बर १ का मुख्यमन्त्री शेरधन राईले संघीय सरकारलाई जानकारी गराएरै आफू अमेरिका गएको बताएका छन्।
उपचारका लागि थाइल्याण्ड गएका बेला त्यहीँबाट उनी अमेरिका गएपछि उनको भ्रमण विवादित बनेको थियो।
कात्तिक १६ गते थाइल्याण्ड बैंकक गएका मुख्यमन्त्री राई कात्तिक २८ गते नेपाल फर्केका थिए। दुई वर्षदेखि घाँटीको समस्याबाट पीडित राईको बैंककस्थित बुम्रुनग्राण्ड अस्पतालमा परीक्षण गर्दा रिपोर्ट सामान्य देखिएको थियो। चिकित्सकहरूले छ महिना औषधि सेवन गर्न र नियमित फिजियोथेरापी गर्न सुझाव दिएको राईले जनाएका छन्।
अस्पतालमा परीक्षणपछि रिपोर्ट नआउँदै मुख्यमन्त्री राई अमेरिका गएका थिए। ‘कात्तिक ११ गते प्रदेश मन्त्रिपरिषद् बैठकबाट बैंकक जाने निर्णय भएको थियो,’ मुख्यमन्त्री राईले शुक्रबार जारी गरेको विज्ञप्तिमा भनिएको छ, ‘मेरो निजी भ्रमण र उपचारबारे संघीय सरकारलाई पनि जानकारी गराइएको थियो।’
मुख्यमन्त्री राई वैशाख ६ गते पुन: उपचारका लागि बैंकक जाने विज्ञप्तिमा जनाइएको छ।
‘म सुटुक्क होइन विधिसम्मत नै अमेरिका गएको हुँ,’ भ्रमण विवादित बनेपछि उनले जारी गरेको विज्ञप्तिमा भनिएको छ, ‘कात्तिक २६ गतेमात्रै रिपोर्ट आउने भएपछि सो अवधिमा अमेरिका गएको हुँ।’
उनले कुटनीतिक राहदानी (रातो पासपोर्ट) पनि प्रयोग नगरेको बताएका छन्। पारिवारिक भेटघाटका लागि अमेरिका गएको उनको भनाइ छ। पारिश्रमिकबाट उपचार खर्च गरेको र आफ्ना सहयोगी पारुहाङ राईको नाम जोडेर भ्रमण विवादित बनाउने र सनसनीपूर्ण बनाएर गरिएको प्रचारप्रति उनले खण्डन गरेका छन्।
राईका सहयोगीले पत्रकार लोकमणि राईमाथि आक्रमण गरेको घटना सार्वजानिक भएपछि उनको अमेरिका भ्रमणले चर्चा पाएको थियो।