सरकारले गत १३ गते सर्लाही झडपमा मारिएका कांग्रेस कार्यकर्ताको परिवारलाई १० लाख दिने निर्णय गरेको छ।
गत कात्तिक १३ गते सर्लाहीको क्षेत्र नं. ४ स्थित रामनगर गाउँपालिका वडा नं. ४ मा नेकपा र कांग्रेस कार्यकर्ताबीच झडप भएको थियो। झडपका क्रममा चलेको गोली लागेर कांग्रेस कार्यकर्ता ५० वर्षीय रामविलास महतोको ज्यान गएको थियो।
नेकपा कार्यकर्ताले रामनगर ४ का वडाअध्यक्ष रामनरेश महतोलाई हातपात गरेको विषयमा झगडा भएको थियो। रामनरेश कांग्रेसबाट निर्वाचित वडाअध्यक्ष हुन्। सोही झडपमा परी रामविलासको गोली लागि ज्यान गएको थियो।
महतोको परिवारलाई सरकारले १० लाख दिने निर्णय गरेको बिहिबार सिंहदरबारमा आयोजित पत्रकार सम्मेलनमार्फत् गत २५ गते मन्त्रिपरिषद्को बैठकका निर्णयबारे जानकारी गराउँदै सरकारका प्रवक्ता तथा सूचना तथा सञ्चारमन्त्री गोकुल बाँस्कोटाले बताए।
