वरिष्ठ अधिवक्ता कुसुम श्रेष्ठको ८२ वर्षीय उमेरमा बुधबार निधन भएको छ।
उनी लामो समयदेखि स्वासप्रश्वासको समस्याले ग्रसित थिए। उनको स्वास्थ्य अवस्था गम्भीर भएपछि नर्भिक अस्पताल भर्ना गरिएको थियो। उपचारकै क्रममा उनको मृत्यु भएको नेपाल बार एसोसिएसनका महासचिव खम्मबहादुर खातीले जानकारी दिए।
वरिष्ठ अधिवक्ता श्रेष्ठ पुराना वकिलमध्ये एक थिए। उनी नेपाल ल क्याम्पसका प्राध्यापक पनि थिए।
पञ्चायतकालमा वकालत सुरू गरेका उनले विभिन्न राजबन्दीहरूका मुद्दा लडेका थिए। त्यसमध्ये कांग्रेस नेता तथा पूर्वप्रधानमन्त्री बिपी कोइरालाको मुद्दा एक थियो।
निर्वासनमा रहेका कोइराला स्वदेश फर्केपछि सरकारले उनलाई पक्राउ गरी ज्यान मुद्दा लगायत विभिन्न ८ वटा मुद्दा लगाएको थियो। वरिष्ठ अधिवक्ता श्रेष्ठले बिपीको कानुन व्यवसायीका रूपमा अदालतमा बहस गरेका थिए।
त्यसअघि राजबन्दी भीमनारायण श्रेष्ठ र क्याप्टेन यज्ञबहादुर थापमाको मुद्दा सुनुवाइ क्रममा उनले सेनाको बर्दीसमेत उतार्न लगाएर चर्चामा आएका थिए।
श्रेष्ठ र थापाको मुद्दा पूर्वाञ्चल अदालतमा चलिरहेको थियो। त्यहाँ सैनिक पोसाकका अफिसरहरूको उपस्थिति थियो। अदालतमा सेना वर्दी लगाएर उपस्थिति भए स्वच्छ सुनुवाइ नहुने भन्दै उनले विरोध गरे। त्यसपछि त्यहाँ उपस्थित अफिसरहरू वर्दी फुकाल्न बाध्य भएका थिए।
उनलाई निडर र सक्षम कानुन व्यवसायीका रूपमा चिनिन्छ। उनी पञ्चायतकालीन अवस्थामा पनि सत्तासँग पौंठेजोरी खेल्दै आफ्नो कानुन व्यवसायलाई कायम राखेका थिए।
उनी बारले निकाल्ने 'न्यायदूत' नामक पत्रिकाका संस्थापकसमेत हुन्।
कानुन व्यवसायीहरूको छाता संगठन नेपाल बार एसोसिएसनले उनको निधनबाट आफू स्तब्ध भएको भन्दै श्रद्धाञ्जली व्यक्त गरेको छ।
'लक्ष्मीपूजाका दिन प्रात:कालमा उहाँको स्वर्गारोहण भएको खबरबाट नेपाल बार एसोसिएसन स्तब्ध भएको छ,' बारले विज्ञप्ति जारी गर्दै भनेको छ, 'वरिष्ठ अधिवक्ता श्रेष्ठलाई नेपालको कानुन व्यवसायको एक कहिल्यै नअस्ताउने उज्ज्वल नक्षत्रका रूपमा स्मरण गर्न चाहन्छौं। पार्थिव शरीर हामीमाझ नरहे पनि आफ्नो अमूल्य योगदानमार्फत् उहाँ सधैँ हाम्रामाझ रहनुहुनेछ। उहाँप्रति श्रद्धाञ्जली।'
श्रेष्ठलाई श्रद्धाञ्जली दिन बिहीबार दिउँसो २ देखि ४ बजेसम्म बार एसोसिएसनको केन्द्रीय कार्यलयमा उनको शव राखिने बारले जनाएको छ।
