नेपाल कम्युनिष्ट पार्टीका अध्यक्ष एंव पूर्वप्रधानमन्त्री पुष्पकमल दाहालले संघीय सरकारलाई उछिनपाछिन नगर्न प्रदेश २ का मुख्यमन्त्री लालबाबु राउतलाई सुझाव दिएका छन्।
मंगलबार जनकपुरमा पार्टी कार्यालयको उद्घाटन तथा शुभकामना आदानप्रदान गर्न आयोजित कार्यक्रममा बोल्दै दाहालले संघीय प्रहरी ऐन नबन्दै प्रदेश २ ले प्रदेश प्रहरी ऐन बनाएको र त्यस्तो गर्दै जाने हो भने दुर्घटना निम्तिने चेतावनी दिए।
‘यहाँको प्रदेश प्रहरीको ऐनको कुरा राष्ट्रिय चर्चाको विषय बनेको संविधानको व्यवस्थाले पनि पहिला संघीय प्रहरी ऐन बनाउने र त्यसअन्तर्गत प्रदेशले पनि आफ्नो अवस्थाअनुसार ऐन निर्माण गर्ने कुराको परिकल्पना गरेको छ,’ दाहालले भने, ‘मौलिक हकसम्बन्धी र केही नबनाइ नहुने ऐनका कारण पक्कै ढिला भएको छ तर केही ढिला भयो भन्दैमा नेतृत्वलाई उछिनापाछिन गरेर बाटोमा दुर्घटना हुने गरी ओभरटेक गर्न खोज्नु गल्ती हुन्छ। म मुख्यमन्त्रीजीलाई भन्न चाहन्छु- तपाईंले ओभरटेक गर्न थाल्नुभयो भने दुर्घटनाको खतरा हुन्छ।’
उनले प्रदेशका माग पूरा गर्न संघीय सरकार गम्भीर र जिम्मेवार भएकाले ओभरटेक गर्नु मुर्खतापूर्ण हुने पनि बताए।
यसअघि प्रदेश २ ले संघीय प्रहरी ऐन नबन्दै प्रदेश प्रहरी ऐन बनाएको थियो।
मुख्यमन्त्री लालबाबु राउतको दल संघीय समाजवादी फोरमसँग केन्द्रमा संविधान संशोधनबारे हस्ताक्षर भइसकेको र मधेसी जनताको मागअनुसार नै उचित समयमा संविधान संशोधन हुने दाहालले बताए।
उनले सिके राउतले सञ्चालन गरेको छुट्टै मधेसको अभियानलाई डाँकाहरूको माग भएको बताए।
‘काठमाडौं पहाडका मानिसले मात्र बनाएका होइनन्। मधेसीको रगत र पसिना पनि मिलेर काठमाडौं बनेको हो,’ दाहालले भने,‘कसैले काठमाडौंबाट अलग मधेस बनाउँछु भन्छ भने त्यसले मधेसी जनताको इतिहासप्रति धोका र मधेसी जनताको आत्मसम्मान र पहिचानमाथि ठूलो विश्वासघात हुन्छ। डाँकाहरूले मात्र त्यस्तो माग राख्न सक्छन्।’