नेपाल कम्युनिस्ट पार्टी (नेकपा)को सचिवालय समिति बैठकले काठमाडौं क्षेत्र नम्बर ७ का सांसद रामवीर मानन्धरले सांसद पदबाट राजीनामा दिएको पत्रमा ‘कुनै निर्णय गर्नु नपर्ने’ निर्णय गरेको छ। प्रधानमन्त्री निवास बालुवाटारमा सोमबार बसेको सचिवालय बैठकले मानन्धरको सांसद पदबाट राजीनामा पत्रबारे निर्णय गर्दै उक्त क्षेत्रमा उप–निर्वाचन गराउन नहुने निष्कर्षमा पुगेको हो।
नेकपाको अघिल्लो सचिवालय बैठकमा अध्यक्ष पुष्पकमल दाहालले मानन्धरको राजीनामा पत्र पढेर सुनाएका थिए।
‘रामवीरको त्यो पत्रमा अब कुनै निर्णय गर्न नपर्ने निर्णय सचिवालयले गर्यो,’ नेकपा प्रवक्ता नारायणकाजी श्रेष्ठले सेतोपाटीसँग भने।
सोमबारको सचिवालय बैठकमा मानन्धरको राजीनामा निर्णयबारे प्रायः सचिवालय सदस्यले बिरोध गरेका थिए।
‘अहिले काठमाडौं क्षेत्र नम्बर ७ मा उप–निर्वाचन गर्ने र सांसदको राजीनामा विषय असान्दर्भिक रहेको बैठकले निष्कर्ष निकाल्यो,’ श्रेष्ठले भने।
पार्टीकै नेता वामदेव गौतमका लागि निर्वाचन क्षेत्र खाली गराएको भन्दै काठमाडौं क्षेत्र नम्बर ७ का सांसद मानन्धरले केही दिनअघि पदबाट राजीनामा दिएका थिए। उक्त राजीनामा र बर्दियाबाट पराजित गौतम पुनः उप–निर्वाचनमार्फत सांसद बन्ने प्रयासबारे पार्टी तथा बाहिर अत्यधिक विरोध भएको थियो।
रामवीरको राजीनामालगत्तै विरोध सुरू भएपछि गौतमले उक्त निर्वाचन क्षेत्रबाट आफू चुनाव नलड्ने घोषणा गरेका थिए। पार्टीको यो निर्णयसँगै मानन्धरको राजीनामा अब संघीय संसदमार्फत पनि अस्वीकार हुने निश्चित छ।
आइतबारको बैठक लामो समयसम्म मानन्धरको राजीनामा विषयमा केन्द्रित भएको थियो।
यस्तै, सचिवालय बैठकले विभिन्न राजनीतिक एजेन्डामा छलफल गर्ने निर्णय गरेको छ।
श्रेष्ठका अनुसार पार्टीका वरिष्ठ नेता माधवकुमार नेपालले प्रदेशको कमिटी गठनको असन्तुष्टि, पार्टी सञ्चालन विषयमा दर्ता गराएको पत्रबारे छलफल गर्ने एजेन्डा तय भएको छ। नेपालले लिखित दर्ता गराएको उक्त पत्रबारे मंगलबार बस्ने सचिवालयको अर्को बैठकमा छलफल हुने जनाइएको छ।
यस्तै, पार्टी र सरकार सञ्चालनको समीक्ष, प्रदेश र जिल्ला कमिटीको गठन र पूर्णता, जनवर्गीय संगठनको गठनबारे छलफल गर्ने एजेन्डा तय भएको प्रवक्ता श्रेष्ठले बताए।
सोमबार सवा दुई बजेदेखि साँझ सवा सात बजेसम्म नेकपाको सचिवालय बैठक प्रधानमन्त्री निवासमा बसेको थियो। बैठकले प्रधानमन्त्रीले टिका लगाउने समय सीमित पारेको बालुवाटार स्रोतले जनायो।
बैठकमा प्रधानमन्त्री ओली, नेकपा अध्यक्ष पुष्पकमल दाहाल, वरिष्ठ नेता झलनाथ खनाल, माधवकुमार नेपाल, महासचिव विष्णु पौडेल, नेता नारायणकाजी श्रेष्ण, रक्षामन्त्री ईश्वर पोखरेल, गृहमन्त्री रामबहादुर थापालगायत थिए।