चिनियाँ अर्थतन्त्र पछिल्ला नौ वर्षमा सबैभन्दा कम दरले बढेको छ।
चीनले भर्खरै सार्वजनिक गरेको तथ्याङअनुसार चिनियाँ अर्थतन्त्र जुलाईदेखि सेप्टेम्बर महिना सम्ममा ६.५ प्रतिशतले मात्र बढेको छ। यो वृद्धिदर सन् २००९ देखि यताकै सबैभन्दा कम भएको बिबिसिले जनाएको छ।
चिनियाँ अर्थन्त्रमा ऋणको भार बढ्दै गएपछि अर्थतन्त्रको वृद्धिदर नियन्त्रित राख्ने नीति चिनियाँ सरकारले लिएको छ।
अर्थतन्त्रमा देखिएका खतरालाई सामना गर्न बेईजिङले प्रयत्न गरिरहेका बेला चीनले अमेरिकासँग ‘ब्यापार युद्व’ को सामना गर्नुपरेको छ। अमेरिकाले चीनबाट आयात हुने २५० अर्ब डलर भन्दा बढीका आयातमा भन्सार शुल्क वृद्धि गरेको छ।
सन् २०१८ को जुनमा सुरूमा ५० अर्ब डलर बराबरका चिनियाँ समानमा २५ प्रतिशत शुल्क थपेको अमेरिकाले सेप्टेम्बरदेखि थप २०० अर्ब डलरका आयातमा १० प्रतिशत शुल्क लगाएको छ। यो शुल्क आउने जनवरी १ देखि बढेर २५ प्रतिशत पुग्नेछ।
अमेरिकासँगको ‘व्यापार युद्व’ ले चिनियाँ अर्थतन्त्रलाई थप शिथिल बनाउने धेरै विश्लेषकको अनुमान छ।
अर्थतन्त्रमा चुलिँदो आन्तरिक ऋण र अमेरिकासँग चर्कदो 'ब्यापारिक युद्व’ को चुनौति चीनले एकैपटक सामना गर्नुपरिरहेको बिबिसिले जनाएको छ।
ऋण धेरै बढेको अवस्थामा ‘ब्यापार युद्व’ का कारण अर्थतन्त्र थप सुस्त भएमा बेइजिङलाई सन् २००८को आर्थिक संकटको समयमा जस्तो अर्थतन्त्रमा थप पैसा प्रवाह गर्ने सुविधा नहुने बिबिसिले जनाएको छ।
यो ब्यापारिक तनाव माझ अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबिच आगामी महिना जी-२०को बैठकमा भेटघाट तय भएको छ।
यो दुई शक्तिशाली राष्ट्रपति बिच अमेरीका-चीन ब्यापार युद्व पछिको पहिलो भेट हुनेछ।
