प्रमुख प्रतिपक्षी दल नेपाली कांग्रेसका नेता एवम् पूर्व रक्षामन्त्री भीमसेनदास प्रधानले प्रधानमन्त्री केपी शर्मा ओली नेतृत्वको सरकारले बूढीगण्डकी चिनियाँ कम्पनी गेजुवालाई दिएकोमा आपत्ति जनाउँदै उक्त परियोजना गेजुवाले बनाउन नसक्ने ठोकुवा गरेका छन्।
बुधबार राजधानीमा आयोजित एक कार्यक्रममा बोल्दै उनले भने,‘म आफैं पनि सरकारमा भएको बेला बूढीगण्डकीको विषयमा टुंगो लागिसकेको थियो। नेपालमा गेजुवाको रेकर्ड राम्रो छैन। त्यसकारण गेजुवालाई दिनु भनेको गलत हो। गेजुवाको अरु विजनेश राम्रो छ। तर, नेपालमा उसको विगत हेर्ने हो भने उ असफल कम्पनी हो।’
सरकारको उक्त निर्णयको बारेमा सबै ठाउँमा विरोध भएको उनले सुनाए। प्रधानले भने,‘नेपालमा पनि विरोध भएको छ । सरकारले यसमा पुनर्विचार गर्नुपर्छ। यदि पुनर्विचार गरिएन भने फेरि द्वन्द्व हुन्छ। यही कारणले भोलि वर्तमान सरकार असफल हुन्छ।’
सरकारले यो निर्णय गर्दा प्रतिपक्षी दलसँग कुनै छलफल तथा परामर्श नै नगरेको भन्दै उनले गुनासो समेत पोखे।
उनले भने,‘प्रतिपक्षीलाई मिलाएर लैजाने काम सरकारको हो। र, प्रधानमन्त्रीको हो । देशको नेतृत्व गरेर बसेको प्रधानमन्त्रीजस्तो व्यक्तिले पार्टीको नेतृत्व गरेर बसेजस्तो अभिव्यक्ति दिनुहुँदैन। यसले गर्दा गणतन्त्रलाई नै खतरा पर्ने सम्भावना हुन्छ।’
यद्यपि उनले सरकार गठन भएको थोरै समय व्यतित भए पनि हुने बिरुवाको चिल्लो पात भनेझैं वर्तमान सरकारले खासै राम्रो छनक भने नदेखाएको गुनासो पोखे ।