प्रधानमन्त्री केपी शर्मा ओलीले इतिहासको खोजी दरबारबाटै हुने बताएका छन्।
नारायणहिटी संग्रहालयमा सर्वसाधारणका लागि श्रीपेच सार्वजनिक गर्ने कार्यक्रममा बोल्दै ओलीले राजाहरूले प्रयोग गर्ने श्रीपेच, राजदण्ड लगायतका सामग्रीहरू इतिहास भएको र तिनको संरक्षण गर्न सरकार प्रतिवद्ध रहेको बताए।
ओलीले शासन र शक्तिका प्रतीक श्रीपेच, राजदण्ड हुननसक्ने भएकोले नै संग्रहालयमा थन्किएको तर तिनको संरक्षण आवश्यक रहेको उनको भनाइ छ।
संरक्षित र लिखित इतिहास शासकहरूको मात्र हुने भएकोले तिनको संरक्षण गरेर सम्पदाको रूपमा विकास गरिने उनको कथन छ। इतिहास शासकै लेखिने भएकोले तिनकै निकटताबाट भावी पुस्तालाई बताउनुपर्ने उनले बताए।
‘शासकहरूले प्रयोग गर्ने भएर यो राजदण्ड, श्रीपेचले संग्रहालयमा ठाउँ पाए तर त्यो राजदण्डभन्दा सयौं वर्षै पुरानो गोरु धपाउने लौरोले यहाँ ठाउँ पाउँदैन’ ओलीले भने,‘इतिहासमा मारिने कालु पाँडे थिए, मृत्यु सेरिने भिमसेन थापा थिए तर इतिहासका नायक ती भएनन्।’
नारायाणहिटी संग्रहालयलाई नेपालको इतिहासको सबैभन्दा ठूलो व्यवस्थित अभिलेखालय बनाउन उनले संस्कृति पर्यटन तथा नागरिक उड्डयन मन्त्रीलाई निर्देशन पनि दिए।
नेपालमा सहिष्णुतापूर्ण राजनीतिक व्यवस्थाको अभ्यास भएको ओलीको भनाइ छ।
‘फालिएका शासकका प्रतीकको यसरी संरक्षण गर्नु, पूर्व शासकहरूलाई सम्मानित बस्ने वातावरण मिलाइदिनु त्यही सहिष्णुताको चिनारी हो’, उनले भने।