संसदको विकास समितिका सदस्यहरूले ठेकेदार सांसदहरूलाई नै समितिमा राखिएकोबारे असन्तुष्टि व्यक्त गरेका छन्।
सभापति चयनपछि मंगलबार समसामयिक विषयमा छलफल गर्न बसेको समितिको बैठकमा बोल्दै सांसदहरूले नियमावलीविपरित ठेकेदारसमेत रहेका सांसदलाई किन समितिमा राखेको भन्दै प्रश्न गरे।
समिति सदस्य जनमोर्चाकी सांसद दुर्गा पौडेलले बैठकमा भनिन्-नियमावलीविपरित ठेकेदारलाई किन समितिमा राखियो? सबैभन्दा पहिला यही विषयमा समितिमा छलफल हुनुपर्छ।
उनले देशभरि विभिन्न स्थानमा पुल नबनाएको पप्पु कन्स्ट्रक्सनलाई फेरि नयाँ ठेक्का दिइएकोबारे सरकारको धारणा माग्नुपर्ने बताइन्।
नेकपाका सांसद यज्ञराज सुनुवारले पनि ठेकेदार सांसदलाई समितिमा राख्नुका कारणहरू पेस गर्नु पर्ने बताए।
विकास समितिमा तीन जना ठेकेदार सांसद सदस्य छन्। पप्पु कन्स्ट्रक्सनका सञ्चालक हरिनारायण रौनियार, लामा कन्स्ट्रक्सनका जिपछिरिङ लामा र हिमदुङ एन्ड ठोकर कम्पनीका बहादुरसिंह लामा समिति सदस्य हुन्। तीमध्ये आजको बैठकमा सांसद जिपछिरिङ लामामात्र उपस्थित थिए। आफ्नाबारे कुरा उठे पनि समिति बैठकमा उनले केही बोलेनन्।
सांसद गणेशकुमार पहाडीका अनुसार समितिको आजको बैठक ठेक्कामा केन्द्रित थियो।
‘राष्ट्रिय गौरवका आयोजनामा ढिलासुस्ती र भ्रष्टाचार कुरा आइरहेका छन्। यसबारे सरकारसँग जवाफ माग्नुपर्छ,’ पहाडीले भने।
समितिले यस विषयमा सरकारसँग जवाफ माग्ने निर्णय गरेको पनि उनले जानकारी दिए।
समिति सभापति कल्याणीकुमारी खड्काले समितिमा कुने सदस्यको स्वार्थ बाझिने गरी निर्णय प्रभावित हुन नदिने प्रतिवद्धता व्यक्त गरिन्।