स्वास्थ्य तथा जनसंख्या राज्यमन्त्री सुरेन्द्रकुमार यादवले अर्थ मन्त्रालयले कामै गर्न नदिएको आरोप लगाएका छन्।
राज्यमन्त्री यादवले अर्थ मन्त्रालयले हस्तक्षेप गरेका कारण आफ्नो मन्त्रालयले काम अघि बढाउन नसकेको स्पष्टिकरण दिएका हुन्।
आइतबार प्रतिनिधिसभा शिक्षा तथा स्वास्थ्य समितिको बैठकमा मन्त्रालयको कामकारबाहीबारे जानकारी गराउने क्रममा उनले कर्मचारीहरूको आन्दोलनले पनि मन्त्रालयको काममा अवरोध गरिरहेको स्पष्ट पारे।
उनले कांग्रेस र कम्युनिष्ट पक्षमा विभक्त कर्मचारीतन्त्रले काम गर्ने वातावरण बिगारेको भन्दै त्यसलाई सल्टयाउन पनि सबै राजनीतिक दलको नेतृत्वलाई आग्रह गरे।
राज्यमन्त्री यादवले जनशक्तिको अभाव रहेकाले देशका सबै ठाउँमा स्वास्थ्यकर्मीहरू परिचालन गर्न नसकिएको पनि स्मरण गराए।
उनले जनशक्ति कम भएपछि सबै ठाउँमा स्वास्थ्यकर्मी पुर्याउन नसक्नुलाई स्वभाविकै रूपमा लिनुपर्नेतर्फ पनि समितिका सदस्यहरूको ध्यानाकर्षण गराए।
बैठकमा समितिका सदस्यहरूले सरकारको काम, कारबाहीलाई प्रभावकारी हुने गरी अघि बढाउन समितिका सदस्यहरूलाई प्रशिक्षणको व्यवस्था गर्न नवनिर्वाचित सभापति जयपुरी घर्तीलाई सुझाव दिएका थिए।
समितिका सदस्य योगेश भट्टराईले समितिको कामलाई प्रभावकारी बनाउन संघीय संसद सचिवालयसँग सहकार्य गरेर सदस्यहरूका लागि प्रशिक्षणको कार्यक्रम आयोजना गर्न सभापति घर्तीलाई आग्रह गरे।
समितिका अर्का सदस्य खगराज अधिकारीले समितिको कामलाई प्रभावकारी बनाउन कार्यविधि बनाउन ढिलाइ गर्न नहुनेमा जोड दिए। उनले समितिको बैठकस्थलको समेत टुंगो लगाउन सभापति घर्तीको ध्यानाकर्षण गराए।
समितिको बैठकमा नवनिर्वाचित सभापति घर्तीले सदस्यहरूसँग व्यापक छलफल गरी समितिको कामलाई अघि बढाउने प्रतिवद्धता व्यक्त गरेका थिए।