प्रमुख प्रतिपक्ष दल नेपाली कांग्रेसले सर्वोच्च अदालतका वरिष्ठ न्यायाधीश दीपकराज जोशीलाई महाअभियोग लगाउने गल्ती नगर्न सत्तारुढ नेपाल कम्युनिष्ट पार्टी (नेकपा) लाई सचेत गराएको छ।
सर्वोच्च अदालतका वरिष्ठ न्यायाधीश जोशीमाथि महाअभियोग लगाउन सत्तारुढ नेपाल कम्युनिष्ट पार्टी (नेकपा) का सांसदहरूले गोप्य रूपमा हस्ताक्षर अभियान सञ्चालन गरिरहेको चर्चा भइरहेका बेला नेपाली कांग्रेसका सांसद राधेश्याम अधिकारीले त्यसो गर्नु गल्ती हुने भन्दै सचेत गराए।
आइतबार राष्ट्रियसभाको बैठकमा विशेष समय लिएर बोल्दै उनले महाअभियोगलाई सामान्य अवस्थामा प्रयोग गर्ने अस्त्रको रूपमा लिन नहुने पनि स्पष्ट पारे।
कांग्रेसले तत्कालीन प्रधानन्यायाधीश सुशीला कार्कीविरूद्ध दर्ता गरेको महाअभियोग गलत भएको स्मरण गराउँदै वरिष्ठ अधिवक्ता समेत रहेका सांसद अधिकारीले कांग्रेसको जस्तै गल्ती हुनेगरी जोशीविरूद्ध महाअभियोग लगाए जनताले सत्तारुढ नेपाल कम्युनिष्ट पार्टी (नेकपा) लाई पनि दण्डित गर्ने बताए।
उनले वरिष्ठ न्यायाधीश जोशीलाई राजीनामा नदिए महाअभियोग लगाउँछौं भन्ने खालको धम्की दिइएको भन्दै आफूहरूलाई सैह्य नहुने चेतावनी पनि दिए।
वस्तुगत आधारविनानै सत्तारुढ नेपाल कम्युनिष्ट पार्टी (नेकपा) ले महाअभियोग लगाउन खोज्नु नै गलत भएको सांसद अधिकारीको दाबी छ।
कांग्रेस सांसद अधिकारीले न्यायालयलाई अमुक पार्टीको शाखा कार्यालय बनाउन नदिने दृढता पनि व्यक्त गरे। राष्ट्रिय जनता पार्टी, नेपालका सांसद वृशेषचन्द्र लालले मणिपाल अस्पतालले २० वर्ष अघि गरेको सहमति अनुसार सप्तरीमा इञ्जिनियरिङ कजेल र जनकपुरमा मणिपाल मेडिकल कलेज खुल्न नसकेको भन्दै त्यस सम्बन्धमा संसदलाई जानकारी गराउन सरकारसँग माग गरे।
मणिपाल अस्पतालले दुवै ठाउँमा इञ्जिनियरिङ कलेज र मेडिकल कलेज स्थापनाका लागि ६ अर्ब २२ करोड बराबरको जग्गा लिए पनि सो सहमति कार्यान्वयन हुन नसकेकोमा सांसद लालको आपत्ति छ।