संघीय संसदले संविधान दिवसको कार्यक्रम नगर्ने भएको छ।
संविधान जारी भएको पहिलो र दोस्रो वर्ष संघीय संसदले भवन परिसरमै चियापान कार्यक्रम गरको थियो।
कार्यक्रममा राष्ट्रपतिलाई समेत निम्त्याइएको थियो। तर, यसपटक भने संघीय संसदले औपचारिक कार्यक्रम स्थगित गरेको हो।
‘दिवस मनाउने जिम्मेवारी सरकारको भएकाले संसदले कार्यक्रम नगरेको हो’, सचिवालयका एक कर्मचारीले भने, ‘अघिल्लो पटक रुपान्तरित संसदमा संविधान बनाएकै माननीय भएकाले कार्यक्रम गरिएको थियो।’
संघीय संसदले कार्यक्रम नगरे पनि राष्ट्रिय सभा अन्तर्गतको विधायन समितिले भने राजधानीको वसन्तपुरमा ‘लोकतन्त्र मेला’ आयोजना गर्ने भएको छ।
संविधान दिवसको अवसर पारेर लोकतन्त्रको विषयमा छलफलका लागि मेला आयोजना गरिएको समिति सभापति परशुराम गुरुङले बताए।
मेलामा नेकपाका अध्यक्ष पुष्पकमल दाहाल, कांग्रेस सभापति शेरबहादुर देउवा, संघीय समाजवादी फोरमका अध्यक्ष उपेन्द्र यादव र राष्ट्रिय जनता पार्टी नेपालका अध्यक्ष महन्थ ठाकुरसँग अन्तरक्रियाको कार्यक्रम राखिएको छ।
त्यस्तै, वसन्तपुर दरबार क्षेत्रमा प्रत्येक राजनीतिक दलको स्टल राखिने र प्रत्येक दलका तर्फबाट साँस्कृतिक कार्यक्रम गरिने गुरुङले बताए।
मेलामा डेनमार्क, बेलायत, केन्या र भारतका सांसदहरू समेत सहभागी हुँदैछन्। संविधानका विशेषता जानकारी दिने स्टल समेत रहने भएको छ। त्यस्तै, खुला मन्तव्यस्थलको समेत व्यवस्था गरिएको छ। जो कोहीले पनि लोकतन्त्र र सम्बन्धित विषयमा उक्त स्थलमा पुगेर बोल्न पाउने व्यवस्था गरिएको गुरुङले जानकारी दिए।
