कञ्चनपुर, भीमदत्त नगरपालिका-२ की १३ वर्षीया निर्मला पन्तको बलात्कार र हत्याबारे थप अनुसन्धान गर्न प्रदेश प्रहरीका एसएसपीको नेतृत्वमा प्रहरी खटाइने भएको छ।
प्रदेश प्रहरी कार्यालय कञ्चनपुरका एसएसपी विक्रम चन्द नेतृत्वको टोलीलाई घटनाबारे थप अनुसन्धान गर्ने र के कसो भएको हो बुझ्नु भनेर पठाइएको प्रहरी प्रवक्ता एसएसपी शैलेश थापाले जानकारी दिए। उनका अनुसार एसएसपी चन्द बिहीबार घटनास्थल पुग्नेछन्।
निर्मलाको साउन १० गते बलात्कारपछि हत्या भएको थियो। उनको शव ११ गते उखुबारीमा फेला परेको थियो। साथीको घरमा गृहकार्य गर्न भनी गएकी निर्मला बेलुकी अबेरसम्म नफर्कीएपछि परिवारले खोजी गरेको थियो।
निर्मलाको हत्या भएको २४ दिनपछि सोमबार प्रहरीले 'मानसिक अवस्था गुमाएका' भीमदत्त-१९ का ४१ वर्षीय दिलिपसिंह बिष्टलाई आरोपी भन्दै सार्वजनिक गरेको थियो। स्थानीयले भने प्रहरीले नक्कली मान्छे खडा गरेर मुख्यदोषी नखोजेको आरोप लगाउँदै मंगलबारबाट कञ्चनपुरमा विरोध प्रदर्शन गरिरहेका छन्। बुधबार दिनभर कञ्चनपुरको अवस्था तनावपूर्ण रह्यो। प्रहरीले प्रदर्शनमा अश्रुग्यास हानेको थियो।
निर्मलाको हत्यारा पहिचान गर्न नसकेको र अनुसन्धानमा ढिलाइ गरेको भन्दै स्थानीयले प्रहरी उपरीक्षक डिल्लीराज बिष्टलाई कारबाहीको माग गरेका छन्।
प्रहरीले भने पक्राउ परेका बिष्टविरुद्ध अदालतमा मुद्दा दायर गर्ने तयारी गरेको छ। घटनाको अनुसन्धानमा काठमाडौंबाट खटिएको केन्द्रीय अनुसन्धान ब्युरोले निर्मलालाई बलात्कार गरी हत्या गरेको 'प्रमाण' सहित बिष्टविरुद्ध अदालतमा मुद्दा दायर गर्न लागेको जनाएको छ।