राष्ट्रियसभा अध्यक्ष गणेश तिमिल्सिनाले कानून निर्माण गर्दा सांसदहरू सत्तापक्ष र प्रतिपक्षका रूपमा प्रस्तुत हुन नहुने बताएका छन्।
राजधानीमा शनिबार जनसंख्या तथा विकासका लागि सांसदहरूको राष्ट्रिय मञ्च, नेपालले आयोजना गरेको संघीय महिला सांसदहरूसँगको अन्तर्क्रिया कार्यक्रममा बोल्दै अध्यक्ष तिमिल्सिनाले कानून निमार्णमा सत्ता पक्ष र प्रतिपक्षी नभइ विधायक भएर काम गर्न सांसदहरूलाई सुझाव दिए।
अध्यक्ष तिमिल्सिनाले नेपालको संसदीय अभ्यास देश र जनताको आवश्यकताअनुसार विधि निमार्ण गर्नुभन्दा पक्ष र विपक्षमा विभाजित हुनु दु:खद भएको बताए।
‘बहुदल प्राप्तिपछि गठन भएका संसदमा सांसदहरू विधि निर्माण गर्नेभन्दा बढी फाइल बोकेर मन्त्रालय धाउने विकासे नेता भए,’ उनले भने, ‘नयाँ संविधान जसरी मिहिनेत गरी सबै एक भएर निर्माण गर्यौं, कानून निर्माणमा पनि दूरदृष्टिका साथ सक्रिय र एकजुट भएर अगाडि बढ्नुपर्छ ।’
उनले नयाँ संविधानले परिकल्पना गरेको समाजवाद उन्मुख नेपाली समाज निर्माण गर्ने सन्दर्भमा संसदमा प्रतिनिधित्व गर्ने सबै दलको एउटै मत रहेकाले यसको कार्यान्वयनमा पनि एक हुनुपर्ने बताए।
‘संविधान कार्यान्वयनको एउटा चरणको रूपमा तीन तहको निर्वाचन सम्पन्न भइ संघीय, प्रदेश र स्थानीय सरकारले काम गर्न थालिसकेका छन्,’ तिमिल्सिनाले भने, ‘यो अवस्थामा संघीय संसद साँच्चिकै विधायिका हुन जरुरी छ। विधि र नीति निर्माणको तहमा यो संसदले काम गर्नुपर्छ। योजना र विकास निमार्णको जिम्मा प्रदेश तथा स्थानीय तहलाई जिम्मा दिनुपर्छ।’
संघीय संसदले थुप्रै कानून निर्माण गर्नुपर्ने भएकाले गहन रूपमा छलफल र अध्ययन गर्ने हो भने सांसदहरूलाई एक मिनेट पनि फुर्सद नहुने अध्यक्ष तिमिल्सिनाले बताए।
‘संविधानअनुसार समय सीमा तोकिएका र अन्य थुप्रै कानून निर्माण गर्ने जिम्मेवारीमा हामी छौं,’ उनले भने, ‘त्यसैले संसदमा र संसद बाहिर रहनुभएका विषय विज्ञहरूसँग गहन छलफल गरी संविधानले दिएका अधिकार र लिएको लक्ष्य प्राप्तिमा जुटौं।’