प्रदेश नम्बर २ को प्रदेशसभा बैठकलाई सम्बोधन गर्न प्रधानमन्त्री केपी शर्मा ओली शनिबार (केहीबेर अघि) धनुषाको जनकपुर पुगेका छन्। उनले भर्खरै प्रदेशसभा बैठकमा सम्बोधन सुरु गरेका छन्।
विमानस्थल पुगेर मुख्यमन्त्री लालबाबु राउतसहित मन्त्रीले प्रधानमन्त्री ओलीलाई स्वागत गरेका छन्।
प्रधानमन्त्रीले सम्बोधन गर्न लागेको प्रदेशसभा बैठकलाई राष्ट्रिय जनता पार्टी नेपाल (राजपा) का सांसदले भने बहिष्कार गरेका छन्।
राजपाका महासचिव तथा सप्तरीबाट प्रदेशसभामा निर्वाचित सांसद मनिष सुमनले प्रधानमन्त्रीको सम्बोधन बहिष्कार गर्ने निर्णयमा आफूहरू पुगेको बताए।
‘संसदीय नियमावली विपरीत प्रधानमन्त्रीले सम्बोधन गर्दै हुनुहुन्छ। त्यसलै हामीले बहिष्कार गरेका हौं’ प्रदेश सांसदसमेत रहेका सुमनले सेतोपाटीसँग भने, ‘प्रधानमन्त्रीको सम्बोधन बहिष्कार गर्ने पार्टीको संस्थागत निर्णय त होइन। तर सांसदहरूले बहिष्कार गर्ने निचोडमा पुग्यौं।’
नियम विपरीत हुने सम्बोधनको साक्षी बस्न नचाहेकोले बहिष्कार गरेको सुमनले बताए।
‘प्रधानमन्त्री ओलीको व्यवहार आजसम्म पनि ‘कोर मधेश’ विरोधी हो। उहाँका वचन जहिले पनि मधेशका विरुद्ध हुन्छन्’ उनले भने।
प्रदेश २ मा राजपाबाट २५ जना सांसद छन्। ‘केही सांसदहरू प्रदेशसभा बैठकमा बोलेर विरोध गर्न भन्दै जानुभएको छ। हामीहरू संसदभित्रै गएनौं। उनको साक्षी नै बसेनौं’ सुमनले सेतोपाटीसँग भने। २५ जनामध्य १० जना सांसद संसद भवन भित्रै प्रवेश नगरी बाहिरै बसेको उनले बताए।
प्रधानमन्त्री ओली, नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्ड, मन्त्रीहरु उपेन्द्र यादव, मातृका यादव, रघुवीर महासेठलगायत पनि जनकपुर पुगेका छन्।
प्रधानमन्त्रीलाई कालो झण्डा
प्रधानमन्त्री ओलीलाई राजपा नेताहरुले जनकपुर विमानस्थलमा कालो झण्डा देखाएका छन्। कालो झण्डा देखाउन संलग्न रहेको आरोपमा प्रहरीले राजपाका पाँच जनालाई पक्राउ गरेको छ।
