नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले नेपाली कांग्रेसले डाक्टर गोविन्द केसीका एजेण्डा बोकेर अवसानको बाटो रोजेको बताएका छन्।
केसीको पुच्छर समातेर कांग्रेसले संघीय लोकतान्त्रिक गणतन्त्र हरण गर्न खोजेको आरोप प्रचण्डले लगाए।
'नेपाली कांग्रेसले के खोजेको हो?' राजधानीमा सोमबार आयोजित कार्यक्रममा प्रचण्डले प्रश्न गरे, 'कांग्रेस यति निम्सरो, एजेण्डाविहीन भइसक्या हो? आफ्नो केही एजेण्डा छैन, केसीका माग पूरा गर भनेर तोडफोड गर्न खोजेको हो?'
प्रचण्डले कांग्रेसले अवसानको बाटो रोजेको बताए।
'मेरो दृष्टिमा कांग्रेस अब सकियो अवसानको बाटो हो यो' उनले भने, 'केसीसँग लचिलो भएर वार्ता गर्न तयार छौं।'
सरकारले वार्ता टोली बनाएको बताउँदै प्रचण्डले पार्टी र सरकारलाई बदनाम बनाउने खेल भइरहेको बताए।
लोकतान्त्रिक भनिएको कांग्रेसले सरकारमा हुँदा केसीका माग पूरा गर्न नसकेको प्रचण्डले बताए।
'डाक्टर केसीले नेपालमा पहिलोचोटी अनसन बस्या होइन यो भन्दा पहिले १५ चोटी पहिल्यै बसिसक्नुभएको छ' उनले भने, 'लोकतान्त्रिक भनेको सरकारको बेलामा सबैभन्दा धेरै पटक केसी अनसन बस्नुभएको छ। उहाँहरूले के हेरेर बस्नुभएको थियो त्यतिबेला? माग सम्बोधन किन गर्नुभएन?'
केसीको जीवन रक्षा गर्ने दायित्व सरकारको भएकोले जुम्लाबाट काठमाडौं ल्याइएको उनले बताए।
'कथित लोकतान्त्रिक भन्ने तागत सायद उहाँको हत्या गर्न चाहन्छ र लासमाथि राजनीति गर्न चाहने हो कि भन्ने प्रश्न गम्भीर रूपले खडा भएको छ' प्रचण्डले भने।
