प्रधानमन्त्री केपी शर्मा ओलीका प्रेस सल्लाहकार कुन्दन अर्यालले डा. गोविन्द केसीसँग छलफलमा शिक्षामन्त्री र पार्टीका नेताहरू लागिरहेको बताएका छन्।
नेकपाका प्रवक्ता नारायणकाजी श्रेष्ठले आइतबार अनसनरत डा. केसीसँग छलफल गरेका थिए। जुम्लाबाट उठाएर काठमाडौं ल्याइए पनि सरकारले केसीसँग वार्ता गरेको छैन। अर्यालले भने नेताहरू केसीका मागबारे अनौपचारिक छलफलमा रहेको बताए।
डा. केसीले पोजिसन त्यागेको खण्डमा वार्ता हुने उनले उल्लेख गरे।
उनले नेपाली कांग्रेसले केसीलाई उचालिराखेको आरोप समेत लगाए।
शनिबार केसीको समर्थनमा निस्किएको र्यालीमा पूर्वप्रधानन्यायाधीश सुशील कार्कीले राखेको धारणाबारे समेत अर्यालले प्रश्न उठाए।
‘सत्याग्रह ‘आगो बल्छ’ भनेको के हो?’, अर्यालले भने, ‘हामी सबैको धारणा मेडिकल शिक्षाको विकृति अन्त्य गर्ने भन्ने हो। तर माथेमा कार्यदल जस्ताको तस्तै हुनुपर्छ भन्ने अडान भएन। समय र सन्दर्भ हेरेर छलफल गरौं।’
अर्यालले ‘केसीको जीवन रक्षा’का लागि काठमाडौं ल्याइएको बताए। ‘उहाँ अहिले ठिक ठाउँमा आउनु भएको छ’, अर्यालले भने।
केसीको अवस्था गम्भीर बनिसक्दा पनि किन वार्ता नगरेको? भन्ने प्रश्नमा अर्यालले भने – ‘स्वास्थ्य हेरेर जे सुकै पारित गर भन्न भएन। अनावश्यक अडान त राख्नु भएन नि।’
चिकित्सा शिक्षा अध्यादेशमा १० वर्ष काठमाडौंमा नयाँ मेलिकल खोल्न नपाइने र एउटा विश्वविद्यालयले पाँच भन्दा धेरैलाई सम्बन्धन दिन नपाउने व्यवस्था हटाएर सरकारले विधेयक अगाडि बढाएको विरोधमा केसी अनसनमा छन्।
उनले विधेयक फिर्ता लिनुपर्ने अडान राखिरहेका छन्। सरकार भने संसदबाट विधेयक अगाडि बढाउने पक्षमा छ।
‘केसीको अनसनले मेडिकल शिक्षाबारे सरकारलाई दबाब भयो, छलफल भयो, डिस्कोर्स भयो। यसलाई अचिभमेन्टको रूपमा लिनुपर्छ’, अर्यालले भने, ‘पाइपलाइनमा भएको विधेयक फिर्ता लिऊ भन्न भएन।’
उनले विधेयक फिर्ता लिने कि नलिने भन्ने अडान उचित नभएको बताए।
‘संसदमा कांग्रेस छँदैछ। उनीहरूले पनि त्यहाँ राखे भइहाल्यो। किन पछि लाग्नुपर्यो?’, अर्यालको प्रश्न थियो।
उनले सरकारले केसीलाई वार्ताका लागि पर्खिराखेको बताए।
‘ट्रयाकमा आएर वार्ता गर्नुपर्छ’, उनले भने। अर्यालले केसीको मागका विषयमा पत्रकारितामा ‘डिस्कोर्स क्रियट’ गर्नुको साटो ‘साइलेन्स क्रियट’ गर्न खोजिएको टिप्पणी गरे।
‘म्यानुफ्याक्चर अफ कन्सेन्ट भयो’, अर्यालले भने, ‘केसीले माग पूरा गर भने भयो नि, किन वार्ता भन्ने र?’
डाक्टर केसीको सत्याग्रहमा आइतबार मुलधारका मिडियाका सम्पादकहरूले समर्थन जनाएका थिए। अर्यालले सम्पादकहरूले केसीसँग भेटर सहमति जनाएको विषयमा उल्लेख नगरे पनि पक्षधरता लिएकोमा भने असन्तुष्टि पोखे।
‘पत्रकारितामा अलरेडिटी पोजिसनको स्थिति भयो’, अर्यालले भने, सोसल मिडियाभन्दा मिडिया एंगलले फरक पार्ने हो। राजनीतिक पक्षधरता हुनुहुन्न।’
