कानूनमन्त्री शेरबहादुर तामाङ र एकजना व्यवसायीले बंगलादेशमा अध्ययन गरिसकेका र अध्ययनरत छात्राहरूको अस्मिता र सामाजिक प्रतिष्ठाबारे व्यक्त गरेका अभिव्यक्ति सुनेर पनि प्रधानमन्त्री मौन बसेको भन्दै नेपाली कांग्रेसले ध्यानाकर्षण गरेको छ।
उनीहरूको अभिव्यक्ति तत्काल नियन्त्रण गर्न नेपाली कांग्रेसले प्रधानमन्त्रीलाई स्मरण गराएको छ।
कांग्रेस प्रवक्ता विश्वप्रकाश शर्माले आइतबार विज्ञप्ति जारी गर्दै उनीहरूका अभिव्यक्ति आपत्तिजनक रहेकाले तत्काल नियन्त्रण गर्न भनेका हुन्।
कानूनमन्त्री तामाङले बंगलादेशमा अध्ययनरत छात्राहरूले आफूलाई नबेची सर्टिफिकेट पाउँदैनन् भन्ने अभिव्यक्ति दिएका थिए। उनले आफ्नो अभिव्यक्तिमा माफी मागिसकेका छन्। त्यस्तै बिएण्डसी अस्पतालका सञ्चालक दुर्गा प्रसाईंले बंगलादेशमा पढ्ने छात्राहरूबारे आपत्तिजनक भनाइ राखेको भिडियो भाइरल भएको छ।
कांग्रेसले दुवैका अभिव्यक्तिमा आपत्ति जनाएको हो।
'बंगलादेशमा अध्ययन गरिसकेका र अध्ययनरत हाम्रा चेलीहरूको अस्मिता, सामाजिक प्रतिष्ठा र पारिवारिक मनोभावलाई हेक्का नराखी व्यक्त धारणाहरू अत्यन्तै निन्दनीय र आपत्तिजनक छन्,' विज्ञप्तिमा भनिएको छ, 'एकजना व्यवसायीले मात्रै होइन, सरकारको मन्त्रीले समेत यस्तो अभिव्यक्ति राख्दा प्रधानमन्त्रीको मौनता झनै गम्भीर कुरा हो।'
गैर जिम्मेवार अभिव्यक्तिहरूबाट छात्राहरू एवं तिनका मातापिता र परिवारजनमा पर्न गएको गहिरो चोटले नेपाली कांग्रेसलाई पनि मर्माहत तुल्याएको विज्ञप्तिमा उल्लेख छ।
'स्वयं प्रधानमन्त्रीबाट बेलाबेला हलुका अभिव्यक्ति बाहिरिने गरेका बेला जिम्मेवार मन्त्रीको गैरजिम्मेवार अभिव्यक्तिमा कारबाही गर्ने कसले? तर छोरी चेलीलाई देवीका रूपमा मान्ने हाम्रो संस्कार स्मरण गराउँदै यस्ता अभिव्यक्तिलाई तत्कालै नियन्त्रणमा लिने दायित्व फेरि पनि प्रधानमन्त्रीकै रहेको विषय स्मरण गराउन चाहन्छौं,' कांग्रेसको विज्ञप्तिमा उल्लेख छ।