२१ दिनदेखि अनसनरत त्रिवि शिक्षण अस्पतालका प्राध्यापक डा. गोविन्द केसीका माग पूरा गराउन प्रधानमन्त्री निवास अगाडि डाक्टरहरूले धर्ना दिएका छन्।
डाक्टर सुमित पाण्डेको नेतृत्वमा गएको रेजिडेन्टस एसोसिएसन अफ न्याम्सका ४०-४५ जनाको समूहले डा केसीका माग अविलम्ब पूरा गरी उनको जीवन रक्षा माग गर्न प्रधानमन्त्रीको ध्यानाकर्षण गराएका हुन्।
प्रधानमन्त्री निवास अगाडि सो समूहले विभिन्न नारा लेखिएका प्लेकार्ड प्रदर्शन गरेका थिए।
प्लेकार्डमा ‘डा. गोविन्द केसीका माग पूरा गर, दुई तिहाइ भन्दैमा जनता मार्न पाइँदैन, तिम्रो मार्सी भोजनले समाजवाद आउँदैन’ लगायत लेखिएको थियो।
डा.केसीलाई बिहीबार सरकारले बलजफ्ती गरेर जुम्लाबाट काठमाडौं ल्याएर टिचिङ अस्पतालमा राखिएको छ। उनी अस्पतालमै अनसन जारी राखेका छन्।