नेपाली कांग्रेसका वरिष्ठ नेता रामचन्द्र पौडेलले सरकारका विभिन्न गलत प्रवृत्तिका विरुद्ध सचेत गराउन कांग्रेस अब सडकदेखि सदनसम्म आन्दोलनमा उत्रने बताएका छन्।
नेकपा सरकारको विभिन्न तानाशाही प्रवृत्तिको बारेमा जनतालाई जानकारी दिन र सरकारलाई सचेत गराउन यही साउन १५ गते देशैभर विरोधको कार्यक्रम तय गरेको बताए।
चितवनबाट हेटौंडा हुँदै वीरगंज जाने क्रममा बिहिबार बिहान हेटौंडामा भएको नेता तथा कार्यकर्ता भेटघाटको क्रममा नेता पौडेलले सरकारको गलत निर्णय र प्रवृत्तिको बारेमा सरकारलाई सचेत गराउन सडकदेखि सदनसम्म कांग्रेस आन्दोलनमा उत्रनुपरेको बताए।
संविधानको भावना र मर्मविपरीत फरक पार्टीको सभामुख र उपसभामुख हुनुपर्नेमा २ वटै सिट हडप्दै तानाशाह लाद्न खोजेको बताउँदै नेता पौडेलले कांग्रेस जहिल्यै समानतामूलक र न्यायमूलक समाज निर्माणमा लागिपरेको बताए।
लामोसमयदेखि अनसनरत डा. गोविन्द केसीको मुद्दा जायज भएको भन्दै माथेमा आयोगको प्रतिवेदनलाई अघिल्लो सरकारले अध्यादेशको रूपमा ल्याउँदा अहिलेको सरकारले स्वास्थ्य माफियाहरूको प्रलोभनमा परेर ठिक उल्टो बनाएर ल्याएकोमा गम्भीर आपत्ति रहेको बताउँदै नेता पौडेलले अघिल्लो सरकारले ल्याएको अध्यादेश विधेयकको रूपमा ल्याउनुपर्ने बताए।
गुणस्तरीय स्वास्थ्य, गुणस्तरीय शिक्षा हुनु नै समाजवाद हो भन्दै वरिष्ठ नेता पौडेलले नेकपा कमाउ धन्धामा लागेका विभिन्न क्षेत्रका माफियाहरूलाई प्रोत्साहन, राज्यको श्रोत र साधनमा लुटतन्त्र र नयाँ शोषक वर्ग जन्माउन उद्धत रहेको बताए।
नेकपाका नेताहरूलाई कम्युनिज्म लागू गर्न चुनौती दिँदै कांग्रेस र कम्युनिष्टको विगत र अहिलेको काम कार्बाहीको तुलना गर्न आमजनता तथा पार्टीका कार्यकर्तालाई आग्रह गर्दै नेता पौडेलले कांग्रेस आजसम्म पूर्वाधार विकासमा लाग्यो अब जनतालाई समृद्ध बनाउन लाग्ने बताए।