सरकारले इन्टरनेट सेवा शुल्क बढाएको भन्दै प्रमुख प्रतिपक्ष दल नेपाली कांग्रेसमा आबद्ध नेपाल विद्यार्थी संघले विरोध प्रदर्शन सुरू गरेको छ।
नेपाल विद्यार्थी संघले इन्टरनेट सेवा शुल्क १३ प्रतिशत पुर्याएको भन्दै बुधबार दिउँसो कमलादीस्थित नेपाल दूरसञ्चार प्राधिकरण कार्यालय परिसरमा धर्नासहितको विरोध प्रदर्शन गरेको हो।
त्यस क्रममा संघले तत्काल बढाइएको सेवा शुल्क फिर्ता नगरे सरकारविरुद्ध कडा संघर्षमा जान बाध्य हुने चेतावनी पनि दिएको छ।
सरकारले विद्यार्थीहरूलाई झनै मारमा पार्ने गरी इन्टरसेवा शुल्क १३ प्रतिशत पुर्याएपछि त्यसको विरोध स्वरूप धर्नासहितको कार्यक्रम सुरू गरिएको संघका अध्यक्ष नैनसिंह महरले जानकारी दिए।
संघले इन्टरनेटमा बढाएको सेवा शुल्क तत्काल घटाउन माग गर्दै प्रधानमन्त्री केपी शर्मा ओलीलाई ज्ञापनपत्र बुझाउने तयारी पनि गरेको छ। अध्यक्ष महरले सूचनामाथि प्रतिबन्ध लगाउने खालका गतिविधिमा संलग्न नहुन पनि सरकारलाई चेतावनी दिए।
