प्रमुख प्रतिपक्षी दल नेपाली कांग्रेसका युवा नेता प्रदीप पौडेलले वर्तमान सरकारले आफ्नो कार्यशैली नसच्याए प्रधानमन्त्रीको राजीनामा माग्न आफूहरू बाध्य हुने चेतावनी दिएका छन्।
बुधबार राजधानीमा आयोजित एक कार्यक्रममा बोल्दै उनले सो कुरा बताएका हुन्।
कार्यक्रममा बोल्दै नेता पौडेलले भने,‘वर्तमान सरकारको सय दिन हामीले हेर्यौं, यो बीचमा सरकारका सबै तौल र तरिका पनि हेर्यौं, नीति तथा कार्यक्रमको हामीले ताली पिट्यौं तर सरकारले खासगरी प्रधानमन्त्री केपी शर्मा ओलीले हाम्रो यो समर्थनलाई कमजोरी ठान्नुभयो, प्रधामन्त्रीले दुई तिहाइको दम्भ देखाउनुभयो, त्यसैले सरकारकै कारण हामी आज सडक र सदन दुवै ठाउँमा संघर्षमा उत्रिन बाध्य भएका छौं।’
नेता पौडेलले वर्तमान प्रधानमन्त्री ओली संविधानको ‘कमा’ र ‘फुलस्टप’ पनि परिवर्तन गर्न हुँदैन भन्ने व्यक्ति भएकोले र संघीय समाजवादी फोरम नेपालका अध्यक्ष उपेन्द्र यादव यो संविधानको पूर्नर्लेखन गर्नुपर्छ भन्ने व्यक्ति भएकोले उनीहरू किन मिले ? भनेर सोध्न पाइने कि नपाइने भन्दै प्रश्न समेत तेर्साए । उनले थपे,‘केपी ओली र उपेन्द्र यादव किन मिल्नुभयो ? यो विषय पारदर्शी हुनुपर्छ।’
वर्तमान सरकारले विश्वविद्यालयका उपकुलपतिलाई विमानस्थलबाट कब्जा गरेर थुनेको, आफू अनुकूल रिपोर्ट बनाउनको लागि अस्पतालबाट डाक्टरलाई अपरहण गरेको, पत्रकारको प्रश्नको सामना गर्न नसक्दा टेलिभिजन कार्यक्रम नै बन्द गराएको, सिण्डिकेट अन्त्यको हल्ला चलाए पनि विभागका महानिर्देशक हटाएको, गलत गर्ने ठेकेदारलाई कारबाही नगरेको, महँगीले आकाश छोएको लगायत जनजीविकाका थुप्रै मुद्दामा वर्तमान सरकार मौन रहेको उनको गुनासो छ ।
उनले थपे,‘त्यति मात्रै होइन, माइतीघर मण्डलालाई निषेधित क्षेत्र घोषणा गर्यो, डाक्टर गोविन्द अहिले १५ औं अनशनमा हुनुहुन्छ, उहाँका माग सम्बोधन गर्न सरकार गम्भीर देखिएन, माथेमा आयोगको प्रतिवेदन अनुसार अध्यादेश ल्याउने सहमति भएको थियो, तर सरकारले त्यसलाई तोडमोड गरेर विधेयक ल्याउन खोजेको छ, यस्तो अवस्थामा अब यो सरकारलाई समर्थन गरिराख्नुको कुनै अर्थ छैन, र त्यस्तो अवस्था पनि अब रहेन।’
सभामुख र उपसभामुख एउटै दलबाट बन्नु संविधानविपरीत भएको भन्दै उक्त कदम तुरुन्त सच्याउनुपर्ने उनको जोड थियो ।
‘हामीलाई सरकारको कब्जाको रणनीति मान्य छैन’,उनले भने,‘सरकारको एउटा निर्णयले आज हजारौंका संख्यामा असर परेको छ, अघिल्लो सरकारले नियुक्ति गरेका सबै कुरा खारेज गर्ने कुराले के देखाउँछ भने सरकारमा दुई तिहाइको दम्भ बढी भयो।’
प्रधानमन्त्री ओली आफूहरुको पनि प्रधानमन्त्री भएको बताउँदै उनले भने,‘उहाँ त हाम्रो पनि प्रधानमन्त्री हो नि, तर उहाँ निरन्तर हामीलाई गाली गर्नुहुन्छ, प्रधानमन्त्रीले आफ्ना चाल, प्रस्तुती र व्यवहारहरू बदल्न जरुरी छ, सरकारले आफ्ना प्राथमिकताहरू बदल्न जरुरी छ।’