‘जनतासँग प्रधानमन्त्री’ नामक टेलिभिजन कार्यक्रम भोलि (बुधबार)देखि प्रसारणमा आउने भएको छ।
नेपाल टेलिभिजनलगायत एपी वान एचडी, हिमालय टेलिभिजन र एबीसी टेलिभिजनबाट बेलुका ९ बजे एकैसाथ कार्यक्रम प्रसारण हुने भएको हो।
कार्यक्रमको सञ्चालन भने मनोज पाण्डेले गर्नेछन्। एक घण्टा लामो यो कार्यक्रमको निर्माण कथा नेपालले गरेको हो।
यो कार्यक्रम निर्माणका लागि अनुसन्धानकर्ता, प्रोफेसर, पत्रकार, स्टोरी एडिटर, प्राविधिक, पब्लिसिटी र व्यवस्थापकीय गरी १५ जनाको टोली निर्माण गरिएको छ ।
यसबाहेक विषयगत रूपमा आवश्यकता अनुसार राष्ट्रिय योजना आयोग, तथ्यांक विभाग, विषयगत मन्त्रालय तथा विश्वविद्यालयहरूलाई समेत अध्ययन–अनुसन्धानका लागि अनुरोध गर्ने योजना रहेको कथा नेपालले बताएको छ ।
कार्यक्रमका लागि लाग्ने सम्पूर्ण खर्चको स्रोत व्यवस्थापन कथा नेपाल आफैंले गर्ने जनाएको छ ।
‘जनतासँग प्रधानमन्त्री’ मा कुनै पनि आयातित सामान, गुणस्तर विभागले तिम्रा सामान गुणस्तरीय छैनन्, पब्लिकलाई नबेच भनेका सामान, स्वास्थ्यमा प्रतिकूल असर पार्ने जंकफुड, भ्याट, ट्याक्स वा यस सम्बन्धी कानूनी झमेलामा फसेका कम्पनीको उत्पादन र सेवाको विज्ञापन नबजाइने बताइएको छ।
‘हामी चाहन्छौं– स्वस्थ व्यापार गर्ने र स्वच्छ व्यवसाय चलाउने तथा रोजगारी सिर्जना गर्ने उद्यमीले ‘जनताासँग प्रधानमन्त्री’ मा विज्ञापन बजाउँदा आफ्नो प्रतिष्ठा बढेको महसुस गरुन्,’ कार्यक्रम प्रस्तोता तथा निर्माता मनोज पाण्डेले भने ।
