अनसनरत डाक्टर गोविन्द केसीको मागमा सरकार लापरबाह भएको भन्दै संसद भवन नयाँ बानेश्वर अगाडि प्रदर्शनमा बसेका मानवअधिकारकर्मीहरू पक्राउ परेका छन्।
पक्राउ पर्नेमा शान्ति समाजका संस्थापक सभापति कृष्ण पहाडीसहित गंगाधर अधिकारी, होमकान्त चौलागाई, कृष्ण कँडेल, रेनुका पौडेल, उत्तम पुडासैनी, बलबहादुर गाहा मगर, बटुकृष्ण ढुंगेल, गीता तिमल्सिना, बाबुहरि आचार्यलगायत छन्।
संसद भवनको तीन नम्बर गेटनिर प्रदर्शनमा बसेका उनीहरूलाई प्रहरीले हस्तक्षेप गरी नियन्त्रणमा लिएको हो। पक्राउ परेका २० जनाभन्दा बढीलाई महानगरीय प्रहरी वृत्त नयाँ बानेश्वरमा राखिएको छ।
उनीहरूले चिकित्सा शिक्षा सुधारमा डा. केसीले राखेका मागमा ऐक्यबद्धता जनाउँदै सत्याग्रहीको जीवन रक्षा गर, स्वतन्त्रता विरोधी निर्णय खारेज गर, स्वेच्छाचारी गतिविधि बन्द गर, शिक्षा र स्वास्थ्यमा माफिया चलखेल अन्त्य गर लगायत प्लेकार्ड प्रदर्शन गरेका थिए।
यसअघि मानव अधिकार तथा शान्ति समाजले प्रधानमन्त्री कार्यालय सिंहदरबार र प्रधानमन्त्री निवास बालुवाटार अगाडि प्रदर्शन गरिसकेको छ।
सबै तस्बिरहरू : निशा भण्डारी/सेतोपाटी