प्रतिपक्षी दल नेपाली कांग्रेसले सोमबारको संसद बैठक फेरि अवरुद्ध गरेको छ।
अनसनरत डाक्टर गोविन्द केसीको माग र उनको स्वास्थ्यप्रति सरकार गैरजिम्मेवार भएको भन्दै कांग्रेसले प्रतिनिधिसभा बैठक सुरु गर्न लाग्दा दोस्रो पटक अवरुद्ध गरेको हो।
चिकित्सा शिक्षा क्षेत्रमा देखिएका विभिन्न समस्या सम्बोधन गर्नुपर्नेमा थप विसंगति निम्त्याउने र माफियाको चलखेल सहज हुने गरी सरकारले चिकित्सा शिक्षा विधेयक पेस गरेको दाबी कांग्रेसले गरेको छ।
सभामुख कृष्णबहादुर महराले सोमबारको बैठक सुरु भएको जानकारी गराउनेबित्तिकै कांग्रेस सांसदहरूले उठेर विरोध गरेका थिए।
सभामुखले पटक/पटक बस्न भने पनि प्रतिपक्षी दलले मानेनन्।
प्रतिपक्षी दलका तर्फबाट मिनबहादुर विश्वकर्मा र सरिता गिरीले बोलेका थिए।
मिनबहादुर विश्वकर्माले सरकार समस्या समाधानमा भन्दा समस्या बल्झाउने नियतमा उद्धत भएको भन्दै आपत्ति जनाएका थिए। संसदमा प्रतिपक्षीले उठाएका आवाज सम्बोधन गर्नुको सट्टा सरकारले संसदलाई नै मजाक बनाउँदै अभिव्यक्ति दिएको उनको आरोप थियो।
‘हामीले अनसनरत डा केसीको माग सम्बोधन गरी उहाँको जीवन रक्षाका लागि पटक/पटक आवाज उठाउँदा पनि सरकार गम्भीर देखिएन। यस घटनालाई मुलुकभित्र र विश्वमा नै चासोका साथ हेरिएको भए पनि सरकारले बेवास्ता गर्यो। तसर्थ उहाँका माग सम्बोधन नभएसम्म संसद चल्न दिदैनौं।
सभामुखले सरकारको कुरा सुन्न आग्रह गर्दा पनि प्रतिपक्षीले भने अवरोध खडा गरिनै रहे।
प्रतिपक्षीले उठेर अवरोध नै सिर्जना गरेको हुँदा संसद अघि बढ्न नसकेकोले बिहीबारसम्मका लागि संसद बैठक स्थगित भएको सभामुखले जानकारी गराए।
