सत्तारुढ नेपाल कम्युनिष्ट पार्टी (नेकपा) का अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ले पार्टीलाई अझै एकताबद्ध बनाउँदै लैजाने प्रतिबद्धता व्यक्त गरेका छन्।
अध्यक्ष दाहालले पार्टीभित्र केही त्रुटि भए सच्याउँदै लैजाने संकल्प लिइएको पनि बताए।
उनले पार्टीलाई कमजोर बनाउन केही शक्तिले चलखेल गरिरहेको उल्लेख गर्दै त्यसबाट सचेत हुन पनि नेता, कार्यकर्तालाई आह्वान गरे।
शहीद विष्णु चौलागाईंको स्मृतिमा आइतबार काठमाडौंमा आयोजित एक कार्यक्रममा बोल्दै अध्यक्ष दाहालले शहीदहरूको सपना खेर जान नदिने पनि बताए।
उनले शहीदहरूकै बलिदानको प्रतिफल स्वरूप मुलुकमा शक्तिशाली कम्युनिष्ट पार्टी बनेको उल्लेख गर्दै त्यो उपलब्धिलाई जोगाएर अघि बढ्ने पनि बताए।
अध्यक्ष दाहालले शहीदहरूले देखाएको बाटोबाटै मुलुकलाई अघि बढाउन आफूले गतिका साथ काम गरिरहेको दाबी पनि गरे।
