नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले गोरखाको फुजेलका कृष्णप्रसाद अधिकारीको हत्या आरोपमा छविलाल पौडेल कारागारमा रहेको विषयमा अदालतको फैसलालाई सम्मान गर्नुपर्ने प्रतिक्रिया दिएका छन्।
चितवनमा बिहिबार पत्रकारले राखेको जिज्ञासामा प्रचण्डले भने 'यो विषयमा मैले अहिले धेरै चर्चा गर्नु उचित हुँदैन। हामीले अदालतको फैसलालाई सम्मान गरेर समस्या समाधानको सकारात्मक वातावरण बनाउनको निम्ति समझदारी र जिम्मेवारीका साथ छविलाल जी अहिले कारागारमा हुनुहुन्छ। अहिले मैले यति मात्रै भन्छु।'
१८ वर्षीय कृष्णप्रसादको २०६१ साल जेठ २४ गते चितवनको रत्ननगर १३ मा तत्कालीन माओवादीले हत्या गरेको थियो।
हत्यारा पहिचान गरी कारबाही गर्न माग गर्दै अनसन बसेका उनका बाबु नन्दप्रसादको निधन भइसकेको छ भने आमा गंगामाया अझै वीर अस्पतालमा अनसनरत छिन्।
फरक प्रसंगमा उनले प्रदेश ३ को राजधानी चितवन भए राम्रो हुने उनले बताए। तर, एक पटक राजधानी तोकिएको ठाउँलाई अन्यत्र सार्दा समस्या आउन सक्ने उल्लेख गरे।
'एक पटक राजधानी तोकिएको ठाउँ नबदल्ने हो कि भन्ने पनि छ। यहाँ मात्रै होइन सातै प्रदेशमा' प्रचण्डले भने।
गृहमन्त्रीको आदेशमा वीर अस्पतालका डाक्टरलाई नियन्त्रणमा लिएकोबारे आफूलाई जानकारी नभएको बताए।
डाक्टर गोविन्द केसीलाई वार्तामा आउन उनले आग्रह गरे। चिकित्सा शिक्षा विधेयक बनाउन संसद सार्वभौम रहेको उनले बताए।