कानून संकायअन्तरगतको डिन कार्यालयमा तालाबन्दी गरिएको छ।
त्रिभुवन विश्वविद्यालयको कानून संकायअन्तर्गत स्नातक तह पहिलो वर्ष (एलएलबी) भर्नाका लागि प्रवेश परीक्षाको उत्तरपुस्तिका जाँचमा अनियमितता भएको भन्दै कार्यालयमा तालाबन्दी गरिएको हो।
डिनले आफू निकट विद्यार्थीलाई प्रश्नपत्र आउट गरेको र उत्तरपुस्तिका जाँचमा अनियमितता भएको भन्दै स्वतन्त्र विद्यार्थी समूहले डिन कार्यालयमा तालाबन्दी गरेको हो।
खुला प्रणालीबाट भर्ना नलिइ डिनले आफू निकट विद्यार्थीलाई प्रश्नपत्र आउट गरी प्रवेश परीक्षा लिएको स्वतन्त्र विद्यार्थी समूहको आरोप छ।
उनीहरूले डिनको राजीनामा माग गर्दै खुला प्रणाली अन्तरगत भर्ना प्रक्रिया नबढुञ्जेल डिन कार्यालयमा तालाबन्दी गर्ने चेतावनी दिए।
असार १४ गते विद्यार्थी संगठनसँगको छलफलमा कोटा प्रणाली लागू नगर्ने सहमति गरेको कानून संकाय डिनको कार्यालयले पुनः पहिलेकै कोटा प्रणाली लागू गरेको हो।
यसअघि स्नातक प्रथम वर्षमा भर्ना हुनका लागि कोटा प्रणाली खारेज गर्ने र प्रवेश परीक्षामा सामेल नभएका विद्यार्थीलाई प्रक्रिया पुर्याई भर्ना गर्ने सहमति भएको थियो।
