स्वास्थ्य राज्यमन्त्री पद्मा अर्यालले चिकित्सा शिक्षा विधेयक संसदमा पुगिसकेको बताउँदै अनसन बसेर नभइ कानूनी बाटोबाटै समस्या समाधान हुने बताएकी छन्।
बुधबार राजधानीमा आयोजित साक्षात्कारमा बोल्दै राज्यमन्त्री अर्यालले सो कुरा बताएकी हुन्।
कार्यक्रममा बोल्दै उनले भनिन्,‘चिकित्सा शिक्षा विधेयक संसदमा पुगेको छ, संसदले नै उहाँले उठाएका मागहरूलाई वैधानिकता दिने हो, उहाँले चाहेको संशोधनलाई सांसदहरूमार्फत् कुराहरू राख्न सक्नुहुन्छ, कानूनी बाटोबाट मात्रै समस्या समाधान हुन्छ, अनसन बसेर हुँदैन, हिजोका दिनहरूले पनि यही कुराहरू देखाइसकेको छ ।’
उनले भनिन्,‘उहाँको स्वास्थ्य अवस्था बिग्रिँदै गैरहेको छ, काठमाडौंमा ल्याएर उहाँको स्वास्थ्य उपचार गर्ने र वार्ता गर्ने सरकारले तयारी गरिसकेको छ, यदि उहाँ काठमाडौं आउन मान्नुभएन भने पनि सरकारी टोली जुम्ला गएर वार्ता तथा सम्वादमार्फत् सहमति गरेर उहाँको अनसन तोडाउँछ।’
मन्त्री अर्यालले डाक्टर केसीको स्वास्थ्य अवस्थाप्रति गम्भीर रहेको बताउँदै उनको उपचारको लागि कुनै कसर बाँकी नराख्ने जनाइन्।
डाक्टर गोविन्द केसीका माग पूरा गर्न र समस्या समाधान गर्न सरकार तयार रहेको पनि स्पष्ट पारेकी छिन्।
कार्यक्रममा बोल्दै उनले भनिन्,‘डा.गोविन्द केसीले अनसन सुरु गरेदेखि नै सरकारले उहाँलाई वार्तामा आउन आग्रह गर्दै आएको हो, सुरुमा उहाँ आफैं वार्तामा आउन चाहनुभएन, डाक्टर केसी हिजोदेखि केही लचकतामा आउनुभएको छ, उहाँले उठाएका मागका बारेमा सरकार गम्भीर छ, केही मागका बारेमा विवाद पनि छ, पक्ष र विपक्ष भएर समस्या समाधान हुँदैन, मैले भनेकै हुनुपर्छ भनेर पनि हुँदैन ।’
उनले अघि थपिन्,‘डा. केसीको समर्थन गर्दै चिकित्सकहरूले आन्दोलनको घोषणा गर्नुभएको छ, कृपया तपाईंहरूको काम बिरामीको सेवा गर्ने हो, आन्दोलन होइन, यसो भन्दैमा तपाईंहरूले आन्दोलन गर्न पाउनुहुन्न भनेको होइन, सरकार समस्या समाधानका लागि तयार छ, यस्तो स्थितिमा तपाईंहरूले आन्दोलन गरेर समस्या समाधान हुँदैन ।’
