नेपाली कांग्रेसका सभापति शेरबहादुर देउवाले कम्युनिष्टको हातमा लोकतन्त्र कदापी सुरक्षित हुन नसक्ने बताएका छन्। मंगलबार कांग्रेस जिल्ला सभापतिको भेलालाई हेटौंडामा सम्बोधन गर्दै देउवाले सरकार सर्वसत्तावादी चरित्रतर्फ उन्मुख भएको टिप्पणी गरे।
'कम्युनिष्ट लोकतन्त्रवादी हुन सक्छन भन्ने भ्रम बाघ शाकाहारी हुन्छ भनेजस्तै हो', देउवाले भने,'सरकार सर्वसत्तावादी चरित्रतर्फ उन्मुख छ। गणतन्त्र, लोकतन्त्र र संघीयता जोखिममा परेका छन्।'
देउवाले सरकारको व्यवहार भाषणमा संघीयता र काममा कम्युनिष्टको जनवादी केन्द्रीयतातर्फ उन्मुख रहेको तर्क गरे।
'केपी ओलीको राष्ट्रवाद लम्पसारवादमा परिवर्तन भएको छ', देउवाले भने, 'संविधानको संरक्षण गर्ने, देशलाई कम्युनिष्टको अधिनायकवादवाट जोगाउने जिम्मेवारीपनि हाम्रो काँधमा आएको छ।'
दुई दिनसम्म चल्ने कांग्रेस जिल्ला सभापतिको भेलामा निर्वाचन परिणामको समीक्षा हुनेछ। सम्बोधनका क्रममा देउवाले वाम गठबन्धनका कारण पराजय बेहोरेको दाबी गरेका छन्।
अब कांग्रेसले सबै ठाँउमा जिम्मेवार तथा प्रभावकारी प्रतिपक्षको भूमिका निर्वाह गर्ने देउवाले बताए।
'हाम्रो पराजय र कम्युनिष्ट पार्टीको एकीकरणले चुनौती थपिएको छ', देउवाले भने, 'म विचलित भएको छैन। मैले आगामी निर्वाचनमा नेपाली कांग्रेसलाई पहिलो पार्टी स्थापित गर्ने प्रण गरेको छु।'
