नेपाली कांग्रेसका जिल्ला सभापतिहरूको तीन दिने भेला आजबाट हेटौंडामा सुरु हुँदै छ। भेलाका लागि ७५ वटै जिल्लाका सभापतिहरू आइसकेको कांग्रेस प्रवक्ता विश्वप्रकाश शर्माले जानकारी दिए।
१२ बजे भेलाको उद्घाटन हुनेछ। पार्टीको विधान, संगठनको संरचना र प्रतिपक्षी भुमिकाबारे सभापतिको भेलामा छलफल हुने प्रवक्ता शर्माले बताए।
भेलाको पूर्वसन्ध्यामा बसेको केन्द्रीय कार्यसमितिको बैठकमा महामन्त्री शसांक कोइरालाले छलफलका विषयबारे जानकारी गराएका थिए।
विधान परिमार्जन गरि संविधान अनुकुल बनाउने, सातै प्रदेशमा संगठनात्मक संरचना निर्माण गर्ने लगायतका विषयलाई केन्द्रमा राखेर विधानबारे सभापतिहरुको भेलामा छलफल हुने छ।
सभापति शेरबहादुर देउवाले विभिन्न समयमा विधान मिचेर निर्णय गरेको आरोप लाग्दै आएको छ। चुनावमा भएको हारको समिक्षाका क्रममा शीघ्र महाधिवेशनको माग समेत केहि नेताहरुले उठाएका थिए। अहिले पनि शेखर कोइराला, गगन थापा, प्रदीप पौडेल लगायत यूवा नेताहरुले शीघ्र महाधिवेशन गरेर पार्टीलाई क्रियाशील बनाउनुपर्ने बताउँदै आएका छन्। देउवापक्षका नेताहरूले भने महासमितिबाट विधान संसोधन गरेर संविधान अनुसारको संरचना निर्माण गर्ने, एकता मार्फत आएको गच्छदार समुहलाई उचित स्थान दिनुपर्ने विषय उठाउँदै आएका छन्। जिल्ला सभापतिको भेलामा पनि यीनै विषयमा छलफल हुने छ।
भदौमा हुने भनिएको महासमिति वैठकले कस्ता विषयलाई लिएर छलफल अघि बढाउने भन्ने कुरा जिल्ला सभापतिको भेलाले सुझाउने नेता प्रदीप पौडेलले बताए।
जिल्ला सभापतिको भेलामा चुनावमा कांग्रेसको हार किन भयो र अब अघि कसरी बढ्ने भन्ने कुराको उत्तर खोजिने पनि उनले बताए।