नेपाल कमयुनिष्ट पार्टी (नेकपा)का स्थायी समिति सदस्य भीम रावलले प्रधानमन्त्री केपी शर्मा ओलीको आसन्न चीन भ्रमण सफल र उपलब्धिमूलक हुने विश्वास दिलाएका छन्।
रावलले पारवाहन तथा यातायातसम्बन्धी सम्झौताबारे प्राटोकलमा हस्ताक्षर हुनसक्ने जनाए ।
आइतबार राजधानीमा आयोजित साक्षात्कारमा बोल्दै रावलले यसअघिको प्रधानमन्त्रीत्व कालमा वर्तमान प्रधानमन्त्री ओलीले चीनसँग गरेको १० बुँदे सम्झौतालाई अब ठोस रूपमा कार्यान्वयन गर्ने बेला आएको सुनाए।
उनले भने,‘यसपटकको उहाँको भ्रमणमा ती १० बुँदे सम्झौतासहित थप सम्झौता हुनसक्ने बुझिएको छ।’ नेपालप्रति चिनियाँ सरकार सकारात्मक रहेको बताउँदै उनले प्रधानमन्त्री ओलीको चीन भ्रमणमा ठोस सहमति हुने अपेक्षा आफूहरूले गरेको जनाए ।
उनले रसुवागढी हुँदै नेपाल र चीन जोड्ने रेल निर्माणको सहमतिलाई ठोस रूपमा कार्यान्वयन गर्ने पहल पनि यो पटकको भ्रमणमा हुने विश्वास दिलाए ।
उनले भने,‘अहिलेसम्म आएको जानकारी अनुसार वर्तमान प्रधानमन्त्री नै प्रधानमन्त्री हुनु भएको बेलामा १० बुँदे सहमति भएका थिए, ती १० विषयहरूका साथसाथै अरु थप विषयहरूमा पनि सहमति तथा सम्झौता हुने कुरा जानकारीमा आएको छ, प्रधानमन्त्रीको यो भ्रमणसँगै रेल निर्माण सहमतिले गति लिन्छ।’
यसअघि चीनसँग भएको १० बुँदे सहमतिहरूमा सबैभन्दा महत्वपूर्ण, उल्लेखनीय र दिर्घकालीन चरित्रको विषयहरूमा नेपालले चिनियाँ भूमि भएर पारवाहन सुविधाको उपभोग गर्न पाउने कुरा रहेको बताउँदै रावलले भने,‘हामीले यसभन्दा अगाडि जहिल्यै पनि पारवाहन सुविधाको कुरा गर्नेबित्तिकै भारत मात्रै गर्ने कुरा थियो, तर अब त्यसो होइन, नेपालले भारतबाट पनि चीनबाट पनि भूपरिवेष्ठित मुलुकको हैसियतबाट पारवाहन सुविधा लिनसक्छ, पाउँछ, यो अन्तर्राष्ट्रिय कानूनबाट प्रदत्त कुरा हो भन्ने कुरालाई हामीले स्थापित गरेका छौं।’
उनले चिनियाँ सरकारको तर्फबाट पनि नेपालले पारवाहन सुविधा प्राप्त गर्न सक्ने कुरामा सकारात्मक रूपमा पहिल्यै नै आफ्नो सहमति जनाइसकेको बताए ।
उनले भने,‘यो विषयमा अब ठोस रूपमा सहमति हुने हामीले अपेक्षा गरेका छौं।’
कतिपय सुरक्षाविद्हरूले उत्तरको हिमालय अलंगनीय (पारै गर्न नसकिने) हो भन्ने व्याख्या गरे पनि अब त्यो अवस्था नरहेको उनको जिकिर छ।
उनले भने,‘हामीले पहिले तातोपानीबाट सडक पार गर्ने जोडेका थियौं, अब रसुवागढी हुँदै नेपाल र चीनमा रेलवेको माध्यमबाट पनि दुई देशलाई जोड्नेबारे पहिल्यै नै जुन सैद्धान्तिक सहमति गरिसकिएको छ, अब त्यसलाई ठोस रूपमा व्यवहारिक कार्यान्वयनको रूपबाट अगाडि जाने कुरालाई यो वर्तमान भ्रमणले अझ गति दिने अपेक्षा गरेका छौं।’
त्यस्तै, उनले विद्युत प्रशारण लाइन र नेपालले निर्माण गर्नुपर्ने तेल भण्डारण गृह निर्माणबारे पनि चिनियाँ सहयोग रहने विश्वास दिलाए। यो पटकको भ्रमणमा यसबारेमा पनि सहमति हुने सम्भावना रहेको उनको विश्वास छ ।
उनले भने,‘चिनियाँ सहयोगमा प्रशारण लाइन र तेल भण्डारण निर्माण हुन्छ।’
चीनसँग रहेको व्यापार घाटा कम गर्न नेपाली वस्तुहरू चीनतर्फ निर्यात गर्नुपर्नेमा सहजता पुर्याउने पनि रावलले जोड दिए । उनले थपे,‘जलविद्युतको विकासमा अझै थप सहमति हुने संभावना छ।’
नेपालमा चिनियाँ सहयोगमा निर्माणाधीन सबै परियोजनाहरूले निर्माणको काममा अझै गति प्रदान गर्ने र जलविद्युत र पूर्वाधारको क्षेत्रमा (सरकारी र निजी) स्तरमा अझै सहयोगको अभिवृद्धि हुने कुरा सरकारले बाहिर ल्याएकोप्रति उनले खुशी व्यक्त गरे।
नेता रावलले भने,‘यी कुराहरूले नेपालको आर्थिक विकासको लागि अत्यन्तै ठूलो योगदान पुर्याउछ, र यिनीहरू महत्वपूर्ण छन्।’
