नेपाल टेलिभिजनको कार्यकारी अध्यक्षमा महेन्द्र विष्ट नियुक्त भएका छन्। नेपाल पत्रकार महासंघका पूर्व अध्यक्ष बिष्ट हाल निजी क्षेत्रको इमेज टेलिभिजनमा समाचार सम्पादक पदमा कार्यरत थिए।
मन्त्रिपरिषद्को बैठकले बिष्टलाई नियुक्ति गर्ने निर्णय गरेको हो। त्यस्तै बैठकले राष्ट्रिय समाचार समिति (रासस)का कार्यकारी अध्यक्षमा हरिहर अधिकारी (श्यामल)लाई नियुक्त गरेको छ। अधिकारी यसअघि सौर्य दैनिकको सल्लाहकार सम्पादक थिए। श्यामल तीसको दशक देखि नेपाली पत्रकारितामा सक्रिय छन्।
प्रधानमन्त्री निवास बालुवाटारमा बिहिबार बसेको बैठकले एशियाली विकास बैंक (एडिबी)का वैकल्पिक निर्देशकबाट डा सोमलाल सुवेदीलाई फिर्ता बोलाउँदै उक्त स्थानमा अर्थ मन्त्रालयका सहसचिव रामशरण पुडासैनीलाई पठाउने निर्णय समेत गरेको छ।
त्यस्तै सरकारले चीनकझ अन्तर्राष्ट्रिय विकास सहायता नियोगबीच मानव विकास सहायतासम्बन्धी समझदारी गर्ने तथा नेपाल सरकार र चीनको द नेशनल डेभलपमेण्ट एण्ड रिफर्म कमिसनबीच उत्पादन क्षमता विकासका लागि लगानी र सहयोगसम्बन्धी समझदारी गर्ने निर्णय गरेको सञ्चार तथा सूचना प्रविधिमन्त्री गोकुलप्रसाद बाँस्कोटाले जानकारी दिए। बैठकले जापान सरकारबाट प्रोजेक्ट फर हुयमन रिसोर्स डेभलपमेण्ट स्कलरसिपअन्तर्गत प्राप्त हुने करीब रु २७ करोड ५५ लाख अनुदान सहायता स्वीकार गर्ने निर्णय गरिएको छ ।
उर्जा, जलस्रोत तथा सिँचाइ मन्त्रालय र चाइना कम्युनिकेशन कन्ट्रक्सन कम्पनीबीच सम्पन्न हुने मेमोरेन्डम अफ अन्डरस्ट्यान्डिङ एण्ड कोअपरेशनलाई स्वीकृत गर्ने र समझदारीपत्रमा हस्ताक्षर गर्न मन्त्रालयले तोकेको पदाधिकारीलाई अख्तियारी प्रदान गर्ने निर्णय गरेको छ ।
सरकारले प्रधान्मन्त्रीको चीन भ्रमण अघि पावरग्रिड इन्टरकनेक्सन सम्भाव्यता अध्ययन गर्न नेपाल विद्युत् प्राधिकरण तथा स्टेट ग्रिड कोअपरेशन अफ चाइनाबीच सहायता सम्झौतामा हस्ताक्षर गर्न अख्तियारी दिने निर्णय समेत गरेको छ। त्यस्तै सरकारले स्थानीय तहमा रहेका सार्वजनिक वित्त तथा खरिद व्यवस्थापनमा संलग्न संस्थाहरुको प्रणाली तथा कार्यविधिलाई सरलीकरण र प्रभावकारी बनाउन अन्तर्राष्ट्रिय विकास संस्थाको आइडिएबाट करीब १५ मिलियन अमेरिकी डलर बराबरको सहायता स्वीकार गर्ने निर्णय गरेको छ। सहायता लागि सरकारका तर्फबाट वार्ता टोली गठन गर्ने निर्णय भएको बास्कोटाले बताए।
